Kigali:Ikarita ya Tap &Go yagabanyije imisoro yaburirwaga irengero

1

Patrick Nsenga Buchana, Umuyobozi Mukuru wa AC Group

Ubuyobozi bw’Ikigo AC Group bwatangije uburyo bwo kwishyura ingendo z’imodoka mu mujyi wa Kigali hifashishijwe ikarita y’Ikoranabuhanga izwi nka Tap &Go , bwatangaje ko kuva aho batangiriye ubu 20 % by’imisoro yanyerezwaga mu rwego rwo gutwara abantu n’ibintu yagabanyutse.

Biragoye ku mugenzi utega imodoka rusange I Kigali kwinjira mu modoka nta karita y’urugendo ya Tap &Go afite.Ni ibintu byabaye nk’ibitonda abagenzi bigitangira. Benshi bamaze kugura izi karita nubwo hakigaragaramo ibibazo by’ikoranabuhanga.

Patrick Nsenga Buchana, Umuyobozi Mukuru wa AC Group, ku munsi wa Kabiri w’inama mpuzamahanga ya Transfrom Africa iherutse kubera I Kigali, yavuze ko ubu buryo bwafashije kugabanya imwe mu misoro yanyerezwaga mu rwego rwo gutwara abantu n’ibintu.

Ati “ Tugitangira, 30 % y’imisoro yaburirwaga irengero ariko ubu ku misoro yinjiraga mu rwego rwo gutwara abantu n’ibintu hiyongereyho 20 %. Ibintu byo gutinda umugenzi ahariranya n’umukomvwayeri , amugarura ibintu nk’ibyo byose byararangiye.”

Buchana yavuze ko bakiri kunoza ubu buryo, nko kuba umugenzi vuba aha azatangira kujya yishyura yifashishije amafaranga abitse ku mirongo ye y’itumanaho.

Ati “Ntabwo byadukundira kugira aho bashyiriraho amafaranga buri hose imodoka zihagarara, turagerageza ariko biragoye. Kubw’ibyo rero, turi gukorana n’ibigo by’itumanaho n’uburyo bwo gukorana n’amafaranga abitse kuri telefone (mobile money) ku buryo uzajya ushyira amafaranga ku ikarita yawe ukoresheje amafaranga ari kuri telefone. Uzajya uva mu rugo, ufate telefone yawe ushyiremo nimero z’ikarita, ugashyiraho amafaranga ukinjira mu modoka.”

Ibibazo bya mbere iyi sosiyete yahuye nabyo ni imyumvire y’abaturage ariko ngo guverinoma y’u Rwanda yabibafashijemo yumvisha abagenzi impamvu yo kugira iyo karita.

Buchana yavuze ko ubu buryo bwo gutwara abantu budafasha abagenzi gusa ahubwo ngo “bunafasha guverinoma nko gushyiraho amafaranga y’ingendo, gufata ibyemezo bigendanye n’urwego rwo gutwara abantu n’ibintu n’ibindi.”

Kugeza ubu abantu 95 000 mu mujyi wa Kigali bakoresha ikarita ya Tap and Go mu ngendo.

Yisangize Inshuti.

Ibitekerezo 1

  1. Muraho?ubu buryo nibwiza,ariko turasaba inzego zifite inshingano za transport gukemura ikibazo cyoguhagarara amasaha 3 cg arenga abantu nategereje imodoka ntaniyobabona ihagaze,mubyukuri biteye agahinda kubona umuntu agera kucyapa cya Taxi saa 17h00 akahava sambili zijoro cg muri Gare,kdi byamaze kugaragarako imodoka zimwe ziba ziparitse zidafite akazi kubera inyungu zabamwe cg imikorere mibi,ubuse nabyo birasabako his excellence ariwe uzaza kubikemura koko?mukosore rwose.NB;uzashaka kubona ibimenyetso uzampamagare mbimwereke usibyeko mpamyako buriwese abibona

Tanga Igitekerezo