Kigali:FAO yaburiye Leta zitita ku bagore bakora ubucuruzi buciriritse bwambukiranya imipaka

Kuri uyu wa Mbere i Kigali hatangiye inama nyungurana bitekerezo y’iminsi ibiri, yahuje abantu baturutse mu Ishami y’umuryango w’abibumbye ryita ku buhinzi n’ibiribwa (FAO) ,impuguke mu zitandukanye mu bucuruzi, aho bari kurebera hamwe uko abagore bakora ubucuruzi buciriritse bwambukiranya imipaka batezwa imbere.

Muri iyi nama havuzwe ibibazo bitandukanye aba bacuruzi bahura nabyo nko kuba za Leta z’ibihugu iyo zikora igena migambi zitabatekereza ho.

Attaher Maiga, Uhagarariye FAO mu Rwanda yavuze ko abagore bakora ubu bucuruzi bakwiye gutekerezwaho kugirango imirimo yabo ibashe kubyara umusaruro.

Ati “Iyo urebye usanga abagore bakora ubu bucuruzi Leta z’ibihugu zitabitaho ngo zibatekerezeho mu igenamigambi ryazo ,usanga bafata ibyemezo nta makuru bafite kuri aba bacuruzi. Birakwiye ko batekerezwaho kugirango babashe kwiteza imbere”

Yakomeje avuga ko kandi ibihugu bikwiye gushyiraho politiki iteza imbere ubu bucuruzi kuko bufite uruhare runini mu kuzanura ubukungu bw’ibihugu byinshi muri Afurika.

Ati “Niba ubu bucuruzi budahawe agaciro ibihugu bizahahombera nibura 2% mu izamuka ry’ubukungu. Uyu ni umubare munini.”

Alice Twizeye ushinzwe ubucuruzi bwo hanze muri Minisiteri y’ubucuruzi, inganda n’Umuryango wa Afurika y’Iburasirazuba, yavuze ko aba bacuruzi impamvu batitabwaho ariko ntaho bagira bakorera ngo hakaba hakenewe ibikorwa remezo birimo amasoko hirya no hino ku mipaka kugirango bagire aho babarizwa.

Mur iyi nama hemejwe ko ababishinzwe bagiye gukora ibishoboka byose ngo hamenyekane umubare nyawo w’abagore bakora ubu bucuruzi no gushyira ho politiki ihamye yo kubarengera kugirango babashe gukora ubucuruzi bwambukiranya imipaka mu buryo bwemewe.

Ndayishimiye Thierry

Yisangize Inshuti.

Ibitekerezo

Tanga Igitekerezo