Kicukiro: Bahangayikishijwe n’ubutaka bwabo bwanditse kuri Leta

Dr Jeanne Nyirahabimana, Meya w’Akarere ka Kicukiro

Bamwe mu baturage bo mu murenge wa Masaka baravuga ko bahangayikishijwe no kuba baraguze ubutaka n’abandi baturage ariko bakaba batemerewe kugira icyo babukoreraho kuko bwanditswe ko ari ubwa leta.

Iki kibazo cyagaragajwe n’abaturage bo mu murenge wa Masaka mu karere ka Kicukiro mu nteko y’abaturage yabaye kuri uyu wa 15 Werurwe 2017.

Umuturage witwa Ndayambaje Jean Claude yavuze ko yaguze ubutaka buri ahitwa Mbabe mu mu murenge wa Masaka ariko nyuma yajya gushaka ibyongombwa byo kubaka agatungurwa no kumva ko ubu butaka ari ubwa leta nyamara yarabuguze n’umuturage.

Yagize ati “Naguze ubutaka muri Mbabe, mpatera ibiti bya makadamiya, ngiye gushaka uko nakubakamo akazu ngo nite ku biti byanjye, barambwira ngo ubutaka si ubwanjye ni ubwa leta, kandi narabuguze, ubu imyaka yange iri kwangirika.”

Nyirasengimana Laurence na we yavuze ko mu gihe cyo kubaruza ubutaka atari ahari ,aho agarukiye yashatse ibyangombwa byerekana ko ubutaka ari ubwe abihabwa n’inzego z’ibanze kugera ku murenge ariko ngo ageze ku karere ka Kicukiro, bamubwiye ko ubutaka atari ubwe ari ubwa leta.

Umuyobozi w’Akarere ka Kicukiro Dr Jeanne Nyirahabimana yavuze ko bishoboka ko ubwo butaka bwaba ari ubw’abaturage gusa kugira ngo leta ijye kubwiyandikaho haba hari impamvu yabiteye, ariko ngo ni bagaragaza neza ko ubutaka ari ubwabo basubizwa.

Yagize ati “Birashoboka ko ubwo butaka ari ubwanyu, mu gihe cyo kubarura ubutaka hari abantu batabubaruje icyo gihe leta yabwiyanditseho kuko nta nyirabwo wagaragaraga, hari n’abandi bagiye bafata ubutaka bwa leta bakabwita ubwabo nyuma bakabugurisha, icyo gihe ikibazo kiba kiri ku wagurishije si uwaguze, niba mugaragaza ko ubwo butaka ari ubwanyu bisazumwa neza musubizwe.”

Aba baturage bavuga ko kuba ubutaka butabanditseho byabateje igihombo kuko nta gikorwa kiramba babukoreyeho ndetse bakaba batakweremerwa ku butangaho ingwate bashaka inguzanyo muri banki.

Yisangize Inshuti.

Ibitekerezo

Tanga Igitekerezo