Inzira iracyari ndende mu kubaka imijyi yunganira Kigali

Prof Shyaka Anastase, Umuyobozi Mukuru w’urwego rw’imiyoborere (RGB) na bamwe mu bayobozi b’uturere turimo imijyi izunganira Kigali bavuga ko hakiri urugendo rurerure rwo kuzamura iyo mijyi.

Gahunda yo guteza imbere imijyi yunganira Kigali ariyo Musanze, Muhanga, Huye, Rubavu, Rusizi na Nyagatare ni imwe muri gahunda zigomba kwihutishwa muri EDPRS II.

Ku mugoroba wo ku wa Gatatu i Kigali hateraniye inama yo gusuzuma ku nyigo yakozwe n’ikigo cy’abanya -Singapore ku kubaka iyo mijyi itandatu yunganira Kigali.

Umuyobozi wa RGB Prof Anastase Shyaka yavuze ko kimwe mu bikubiye muri iyi nyigo ari uko bamenye buri karere imbaraga gafite n’aho kagenda buhoro, bakazabiheraho bakazamura.

Ati :”Ikintu gikomeye twakuyemo ni ukureba buri karere muri turiya 6 imbaraga gafite kakubakira ku iterambere ryako ariko no kureba ibipimo nyamukuru byagenderwaho kugirango buri karere gashobore kubikora.”

Icyakora ngo inyigo yakozwe igaragaza ko hakiri inzira ndende kuko utu turere dusabwa ibintu byinshi ngo tugire imijyi yunganira Kigali.

Ati "Mu nyigo zakozwe n’ubwo n’uturere dusanzwe tunabizi, turacyafite urugendo rurerure. Icyifuzo ni uko yaba ari imijyi minini, mu bantu bayirimo ariko ari abantu bajemo bafite ibyo bakora bafite aho batura bafite amashuri mbese ni ibintu bisaba ubushobozi bwinshi.”

Bamwe mu bayobozi b’utu turere tuzubakwamo iyi mijyi nabo bavuga ko hakiri imbogamizi mu gushyira mu bikorwa iyi gahunda.

Umuyobozi w’akarere ka Rusizi Harerimana Frederic yavuze ko kimwe mu mbogamizi bafite ari imyumvire y’abaturage.

Ati :”Imbogamizi ya mbere ni imyumvire y’abaturage. Urabona cyera twatuye buri wese azi ko azatura aho ashaka aho ababyeyi be batuye, ntiyumve ko ashobora gutura neza adatuye ahongaho . Ikindi kiri ku myumvire ni guteza imbere imiturire, uyu munsi turavuga ngo ni ukubaka inzu bazabanamo ari imiryango ine, ese abanyarwanda baraza kumva gute kubana mu nzu imwe turi imiryango ine ?”

Harerimana yongeyeho ko bafite n’icyuho cy’abakozi kuko abakozi bashyira mu bikorwa iki gishushanyo mbonera badahagije. Avuga ko bagifashwa nk’utundi turere kandi hari hakwiye kubaho umwihariko cyane cyane ku bakozi.

Mujawamariya Beatrice uyobora akarere ka Muhanga we yavuze ko bagifite imbogamizi y’igishushanyo mbonera kitararangira.

Ati :”Ikibazo twebwe ubungubu tugifite ni igishushanyo mbonera, ubu dufite igishushanyo mbonera cyagutse ariko ntidufite icy’umwihariko ngo tumenye ngo aha hagenewe iki, aha hagenewe iki. Ikindi buriya umujyi uzajya kuri hegitari ibihumbi 4 ariko igishushanyo mbonera cy’umwihariko kiri kuri hegitari 870 gusa.”

Mujawamariya yakomeje avuga ko nko mu Karere ayoboye, amafaranga y’ingurane ku bazimurwa akiri make.

Ati :”Indi mbogamizi ni amafaranga adahagije yo kwishyura abimuwe(ingurane) kugirango akarere kagure ubutaka buhagije kabutunganye, gashyiremo ibikorwa remezo, hakorerwe ibikorwa byabugenewe.”


Bamwe mu bayobozi b’uturere tuzubakwamo iyi mijyi izunganira Kigali

Prof Shyaka Anastase avuga ko iyi mijyi kugirango igere ku rwego rushimishije ari uko izaba irimo ibikorwa by’iterambere kuburyo yinjiza amafaranga menshi mu ngengo y’imari byaba na ngomba ikinjiza muri leta amafaranga aruta ayo leta ibaha.

Devadas Krishnadas, Umuyobozi w’ikigo cyo muri Singapore cyakoze ishyirwa mu bikorwa ry’imijyi igwa mu ntege Kigali, avuga ko basanze buri mujyi ugiye ufite umwihariko, kandi ko bateje imbere ibyo byihariye bafite byabafasha no guteza imbere izindi ngeri.

Singapore ni igihugu cyateye imbere mu buryo bwihuse kibukesha gutekereza kure no guhindura imyumvire kuko nacyo na mitungo kamere ihambaye gifite ni mimwe mu mihugu u Rwanda rufatiraho urugero mu iterambere.

Umwaka ushize Leta y’u Rwanda ifatanyije na Banki y’isi, bashoye asaga miliyari 80 z’amanyarwanda mu guteza imbere imijyi izunganira Kigali.Ayo mafaranga mu myaka itanu agomba kwifashishwa mu mu bikorwa remezo nk’imihanda, inzira z’abanyamaguru, ibikorwa bijyanye n’ubuzima, imiyoboro y’amazi, amatara ku mihanda, kongerera ubushobozi ubuyobozi bw’iyi mijyi n’ibindi.


Prof Shyaka Anastase umuyobozi wa RGB

Yisangize Inshuti.

Ibitekerezo

Tanga Igitekerezo