Ibisubizo bya Minisitiri Gatete ku kibazo cy’ingwate ziteshwa agaciro mu guteza cyamunara abambuye banki

Minisitiri w’Imari n’igenamigambi Amb Gatete Claver yavuze ko mu rwego rwo gukemura ikibazo cy’ingwate ziteshwa agaciro mu gihe cyo guteza cyamunara, basabye ko mu rwego rw’umuvunyi hashyirwaho ishami rishinzwe kubikurikirana anashimangira ko BNR yatangiye kujya igenzura uburyo bikorwamo ndetse ko hari n’amabwiriza mashya asobanura neza uburyo guteza cyamunara imitungo y’abananiwe kwishyura inguzanyo bikorwa.

Ibi Minisitiri Gatete yabibwiye abadepite kuri uyu wa 09 Ugushyingo 2017 ubwo yabagezagaho uko ubukungu rusange n’ingengo y’imari bihagaze mu mezi atatu abanza y’ingengo y’Imari ya 2017/2018.

Depite Mukandamage yavuze ko muri iyi minsi uburyo cyamunara zikorwamo usanga birimo akarengane gaturuka ku gutesha agaciro imitungo itezwa cyamunra.

Yagize ati: “Iyo umunyarwanda agize ikibazo cyuko atishyuye umwenda, mu kugurisha ingwate harimo ikibazo gikomeye, mu kugurisha ubona agaciro k’ingwate gatakara cyane. Nibyo koko baba bashaka ayabo ariko kandi iyo baje kugurisha baza batareba inyungu rusange, kandi uwo muntu watanze ingwate iyo bayigurishije make icyo gihe bamutera igihombo gikomeye.”

Yagaragaje ko hari ubwo umuntu aba yarishyuye umwenda wenda akageza nko kuri 75% agasigaza 25% atishyuye, icyo gihe ngo hari ubwo banki iza kugurisha ingwate yishakiramo ya 25% gusa ititaye ku gaciro nyakuri k’ingwate. Icyo gihe banki yo iba iba ikuyemo ayayo ariko wa muntu wasabye inguzanyo ahuriramo n’igihombo gisaga 75% bya ya ngwate ye yateshejwe agaciro.

Hon Mukandamage avuga ko ibi bintu bibabaje ndetse ngo abona hakwiye kubaho urundi rwego rureberera uburyo ingwate zigurishwa rukagenzura niba nta karengane karimo.

Ati: “ Ndumva ko ibyerekeye kugurisha ingwate habaho ubundi buryo byakorwa neza, …. Hakwiye kubaho urundi rwego rureberera niba izo ngwate ziba zagurishijwe neza batitaye gusa ku kuba banki yishyuwe ayayo ariko umuturage we akaba yahahombera.”

Minisitiri w’Imari n’igenamigambi Amb Gatete Claver yavuze ko basabye ko mu rwego rw’umuvunyi hashyirwaho ishami rishinzwe gukemura ibibazo bisa n’iki kandi anavuga ko Banki nkuru y’igihugu yamaze kubona ko iki kibazo cy’ama banki atesha agaciro ingwate kigenda gihombya abaturage ubu ikaba yaratangiye kubyinjiramo ndetse ngo yanashyizeho amabwiriza asobanutse yerekana uburyo cyamunara igomba gukorwa.

Amb Gatete yagize ati: “Twasabye kugirango mu rwego rw’umumuvunyi hageho ishami rishinzwe by’umwihariko imari kubera yuko hari abantu babijyamo batabimenyereye .”

Gusa Minisitiri Gatete na we yavuze ko hari za Banki ziteza cyamunara mu buryo busa no guhima nyir’umutungo ku buryo biba bigaragara ko bitanyuze mu mucyo ari na byo ngo byatumye Banki nkuru y’igihugu (BNR) ibihagurukira.

Ati: “Hari uburyo na banki na zo zifite ukuntu ziteza cyamunara bidaciye mu mucyo, niyo mpamvu ubu BNR yabyinjiyemo ibabwira amabwiriza akaze ku buryo bizajya bikorwa mu buryo bunyuze mu mucyo.”

Avuga ko nubwo umuntu aba yananiwe kwishyura inguzanyo yatse, ngo ntibikwiye ko imitungo ye iteshwa agaciro ikaba yagurishwa ku giciro gito bitewe na banki iba yishakiramo ayayo kandi ngo burya nyir’umutungo aba akiwufiteho uburenganzira.

Minisitiri Gatete yabisobanuye agira ati: “Nibyo urafatiriye kuko umuntu yananiwe kwishyura, wararwaje agera aho atagishoboye kwishyura. Icyo gihe nta yandi mahitamo banki ziba zifite uretse kugurisha ingwate, ariko na byo bigomba gukorwa neza kuko ntabwo biba ari ugukuramo ayabo gusa (banki), ni ukuvuga ngo bigomba gukorwa mu buryo hagira amafaranga asigarira nyir’umutungo kuko uracyari uwe, ntabwo ari uwa banki gusa. Wavanamo ingwate yawe kandi na we akagira ikimusagukira, ibyo rero Banki nkuru y’igihugu yarabihagurukiye.”

Ku ruhande rumwe Minisitiri Gatete avuga ko hakenewe amahugurwa ahagije kugirango abantu bashobore kumenya kwaka inguzanyo bazabasha kubyaza umusaruro bikabafasha kwishyura neza.

Ngo ubundi umuntu yakagombye kumenya igihe cyo gufata inguzanyo, ingano yayo, akanategura neza icyo azayikoresha. Ibi ngo hari gahunda ihari yo kubihugurira abanyarwanda kugirango batazajya bagwa mu bihombo. Yavuze ko hari n’bantu bafata inguzanyo bakajya kuyikoresha ibyo batayigeneye, ibi nabyo ngo bituma bibagora kuyishyura kuko baba bayikoresheje ibyo batateguye ngo barebe niba bizunguka.

Minisitiri Gatete yavuze ko inguzanyo zitishyurwa zikiri ku kigero cyo hejuru kingana na 8%, avuga ko BNR ifatanyije n’andi ma banki bagiye gukora ibishoboka byose inguzanyo zitishyurwa zikagabanyuka.

Yisangize Inshuti.

Ibitekerezo

Tanga Igitekerezo