Harifuzwa ko amafaranga umuturage yakwa ngo yandikishe ingwate agabanyuka cyangwa agakurwaho

Rwema Peter, Umuyobozi wa AMIR

Ishyirahamwe ry’ibigo by’imari iciriritse mu Rwanda (AMIR) riri gukora ubuvugizi ngo amafaranga yo kwandikisha inguzanyo acibwa umuturage wagujije mu kigo cy’imari akurweho, ngo kuko amugiraho ingaruka kandi impamvu yayo ikaba itumvikana.

Ubusanzwe umuturage wemerewe inguzanyo mu kigo cy’imari, acibwa amafaranga angana n’ibihumbi 20 Frw yo kwandikisha ingwate yatanze.

Peter Rwema, Umuyobozi wa AMIR avuga ko ayo mafaranga akwiye kugabanywa kuko usanga hari abaturage abera imbogamizi.

Mu cyumweru gishize, ubwo yaganiraga n’abanyamakuru bari mu mahugurwa ku gukangurira abaturage gukorana n’ ibigo by’imari n’uburenganzira bwabo, Rwema yagize ati “Abanyarwanda bari mu bigo by’imari bakubwira ko kugirango abone iyo serivisi bimuhenda, aho usanga iyo umuntu agiye kwandikisha ingwate kugirango abone inguzanyo, yishyura amafaranga ibihumbi 20.Birumvikana ko iyo umuntu ashaka ibihumbi 200 cyangwa 300, ukamusaba ibihumbi 20 byo kwandikisha ingwate, ni ikiguzi kiba cyiyongere kuyo akeneye.”

Rwema avuga ko ayo mafaranga biba bitagaragara impamvu atanzwe, ikindi ngo yica gahunda umuturage aba yapanze ajya kwaka inguzanyo, dore ko ngo hari ubwo ayo mafaranga bamwaka yo kwandikisha ingwate aba ntayo afite bikaba ngombwa ko nayo ayaguza, bamuha inguzanyo akabanza kuyavanamo.

Avuga ko ikindi kibazo kirimo ari uko iyo umuturage agiye kuguza ibihumbi 200, kwandikisha ingwate yishyura amafaranga amwe n’undi muntu wagujije miliyoni 10.

Rwema avuga ko batangiye ubuvugizi ngo ayo mafaranga agabanywe cyangwa akurweho, kuko nta mpamvu yayo igaragara kandi atuma hari bamwe batinya kujya kwaka inguzanyo cyangwa bayaka ntibagirira akamaro nkuko babyifuzaga.

Ati “Turifuza ko rero ayo mafaranga agabanuka.Biramutse bigabanutse, usanga n’ikiguzi cyo kubona inguzanyo cyagabanyuka.”

AMIR iri gukorana n’inzego zibishinzwe ngo ayo mafaranga umuturage yakwa akurweho cyangwa agabanyuke.

Kugeza ubu abanyarwanda bageze kuri 89 % bakorana n’ibigo by’imari.Muri bo, 73 % bakorana n’ibigo by’imari iciriritse.U Rwanda rwihaye intego y’uko muri 2020, nibura abanyarwanda 90 % bazaba bakoresha ibigo by’imari.

Mu Rwanda habarizwa ibigo by’imari iciriritse 472, bifite umutungo bwite ungana na miliyari zirenga 230 Frw.

Yisangize Inshuti.

Ibitekerezo

Tanga Igitekerezo