Guverinoma ihangayikishijwe n’abanyarwanda benshi bakora amasaha make mu cyumweru

1

Minisitiri w’abakozi ba Leta n’umurimo Judith Uwizeye yatangaje ko bahangayikishijwe n’abanyarwanda bagera kuri kimwe cya kabiri cy’abanyarwanda bafite akazi ariko bagakora amasaha ari munsi ya 30 mu cyumweru.

Yabitangaje kuri uyu wa Kabiri mu kiganiro nyunguranabitekerezo Sena yagiranye n’inzego zifite aho zihuriye n’umurimo, hagamijwe gushaka umuti w’ibibazo bigaragara mu murimo mu Rwanda.

Ubushakashatsi bwa kane ku mibereho y’ingo (EICV4) muri 2015 bwagaragaje ko amasaha aringaniye umunyarwanda ukora akora mu mu cyumweru ari hagati ya 17 na 30 mu cyumweru.

Muri 2014, umubare w’abanyarwanda bagejeje igihe cyo gukora wari miliyoni 6.4

Ubushakashatsi bushya bw’ikigo cy’igihugu cy’ibarurishamibare, bwagaragaje ko 42,8% by’abanyarwanda ubu aribo bafite akazi bagendeye ku bipimo bishya, muri bo 50 % bakaba bakora amasaha atarenze atanu ku munsi.

Minisitiri Uwizeye yavuze ko kuri ubu Leta ihangayikishijwe n’umubare munini w’abantu bakora amasaha make mu cyumweru, mu gihe gahunda ya Leta ari uko abantu babasha gukora amasaha menshi ndetse byanaba ngombwa imirimo myinshi ikajya ikorwa amasaha 24 kuri 24.

Yagize ati “Kimwe cya kabiri cy’abanyarwanda bageze igihe cyo gukora bakora amasaha ari munsi ya 30 mu cyumweru. Ibi ni imbogamizi ikomeye tugomba guhangana nayo…n’abacuruzi benshi saa kumi n’ebyiri saa moya (z’umugoroba) baba bagiye kuruhuka, ariko usibye n’abo n’abahinga ntabwo bibujijwe ko umuhinzi yahinga ubutaka afite akaburangiza kare agashaka ikindi yakora cyamuzanira amafaranga.”

Leta y’ u Rwana ifite gahunda y’uko mu mwaka wa 2020 kimwe cya kabiri cy’abakora bazaba bari mu mirimo itari iy’ubuhinzi.

Nyamara ubushakashatsi bwa kane ku mibereho y’ingo (EICV4) bwasohowe n’ikigo cy’igihugu cy’ibarurishamibare muri 2015, bwagaragaje ko ubuhinzi bukiri hejuru ya 70 %.

Minisitiri Uwizeye yavuze ko bakomeje kongera umubare w’imirimo itari ubuhinzi bashishikariza urubyiruko kwiga amashuri y’imyuga.

Ati “Turagira ngo abantu benshi bagire ubumenyi ngiro kuko niho isoko racu ryerekeza. Kandi n’abasigara mu burezi rusange babashe kubona ya masomo abafasha kuva mu ishuri bumva ko bagiye gukora mu buryo buri pratique ibyo bize mu ishuri kugirango tugabanye umubare w’abarangiza amashuri bumva ko bagiye gushaka akazi ahandi.”

Yavuze kandi ko mu gushakira urubyiruko akazi, bashobora kujya bafata imitungo nk’ubutaka itabyazwa umusaruro bakayiha urubyiruko rufite amaboko rukayibyaza umusaruro.

Ati “Uzasanga akenshi abafite amasambu manini nta bushobozi bwo kuyakoresha bafite, bashaje cyane cyangwa se batanahari kandi ugasanga aho hari urubyiruko rudafite icyo gukora. Twumva hajyaho izo uburyo bwo kuvuga ngo ku kibazo kigaragaye ahantu runaka, niba hari icyakagombye kugikemura, gikorwe.”

EICV4 yagaragaje ko umubare w’abanyarwanda badafite akazi bagejeje igihe cyo gukora ari 2.5 %, icyakora Murangwa Yusuf uyobora Ikigo cy’igihugu cy’ibarurishamibare kuri uyu wa Kabiri yavuze ko ubushakashatsi bushya baherutse gukora bagendeye ku bipimo bishya by’urwego mpuzamahanga rushinzwe umurimo (International Labour Organisation) bwagaragaje ko ubushomeri buri kuri 13.2.


Senateri Bernard Makuza mu nama nyunguranabitekerezo ku murimo

Benshi mu basenateri, abayobozi n’abandi bafite aho bahuriye n’umurimo bari bitabiriye

Yisangize Inshuti.

Ibitekerezo 1

  1. ubuse arigirango dukore iki ko nayo dukora dusigaye dutahana ubusa nimushake icyo mukora munagabanye ibitubangamiye minista

Tanga Igitekerezo