Gicumbi: umururumba ngo ni wo utuma barya amafaranga ya koperative

Abanyamuryango b’amakoperative atandukanye akorera mu karere ka Gicumbi baratunga agatoki bamwe mu bayobozi bayoboye amakoperative gukoresha amafaranga ya koperative mu nyungu zabo bwite.

Ibi babitangaje kuri uyu wa Gatanu ubwo muri aka karere hasozwaga icyumweru cyahariwe kunoza imitangire ya service mu makoperative cyateguwe na RGB muri gahunda yayo bise “Nk’uwikorera” yari yitabiriwe n’abayobozi batandukanye ku rwego rw’igihugu.

Umwe mu banyamuryango b’amakoperative atandukanye baganiriye na Makuruki.rw yavuzeko abayobozi bakunze kurya amafaranga ya koperative ari abafite aho bahurira n’amafaranga.

Yagize ati: “Abayobozi bacu bakunze kuturya ariko si bose, nk’urugero twebwe uwatwibye yari comptable (Kontabure) ariko twaramufashe tumushyikiriza ubuyobozi; ikibazo ni uko yemeye kuyishyura ariko kugeza ubu twaramubuze n’inzira yacagamo ntakiyinyura”.

Uyu munyamuryango asaba ko inzego zishinzwe amakoperative zigomba kongera ibihano ku bayobozi bagaragayeho kunyereza amafaranga kandi hakabaho gukurikirana ko amafaranga bariye bayasubije kandi vuba.

Bamwe mu bayoboye amakoperative bagaragaje zimwe mu mpamvu zituma habaho imikorere mibi mu makoperative ndetse n’impamvu zituma abanyamuryango bamwe na bamwe bikura mu makoperative.

Nshokeyinka Viateur ni umuyobozi wa koperative Tuzamurane/Karenge ikorera mu Murenge wa Bukure, ikora ubworozi bw’inka zitanga umukamo arasobanura zimwe mu mpamvu zituma amakoperative asenyuka.

Yagize ati: “hari abashinga koperative bitabaturutsemo ahubwo ari ukubera inkunga ya Leta noneho inkunga yahagarara bakayivamo bakisubirira mu mirimo yabo isanzwe”.

Nshokeyinka akomeza agaragaza indi mpamvu ituma abayobozi bikubira imitungo y’abanyamuryango b’amakoperative ari ubumenyi budahagije bw’abanyamuryango bwo kumenya gukurikirana ibyabo aho yasabye ko hajya habaho amahugurwa ku banyamuryango bose aho kuba ay’abayobozi b’amakoperative.

Yavuze ko umuyobozi wa Koperative atumiza inama ashaka ko abanyamuryango batanga amafaranga ariko ngo iyo amaze kuyabona ntiyongera gutumiza indi nama noneho kubera ubumenyi budahagije bw’abanyamuryango ntibashobore gukurikirana imikoreshereze y’amafaranga batanga ugasanga umutungo ubaye uwa komite Nyobozi.

N’ubwo kudahugukirwa bihagije bifatwa nk’intandaro yo gucunga nabi no gusenyuka kw’amakoperative, Muhizi Jules Aimable, Umuyobozi w’akarere ka Gicumbi ushinzwe Ubukungu we abona biterwa n’inda nini y’abayoboye amakoperative.

Yagize ati: “Impamvu nyamukuru iterwa ahanini n’umururumba wo gushaka kwigwizaho ibintu bikorwa n’abayoboye amakoperative. Kuko komite ikoze neza ibyo isabwa nta gusenyuka kwajya kubaho kw’amakoperative”.

Muhizi yakomeje avuga ko amahugurwa ari ingenzi cyane ku makoperative kugira ngo imikorere yayo inoge igihugu kibashe gutera imbere.

Tumukunde Aimee ni umwe mu bitabiriye iyi gahunda akaba yaje ahagarariye Ministeri y’Ubucuruzi n’Umuryango w’Africa y’Iburasirazuba (MINEACOM) ari na yo ministeri amakoperative abarizwamo.

Yavuze ko leta y’u Rwanda ifata amakoperative nk’inkingi ikomeye yo kwihutisha ubukungu bw’igihugu ari na yo mpamvu ishyiramo imbaraga mu kuyubaka no gushishikariza abanyarwanda kuyajyamo.

Asubiza ikibazo cy’ikandamizwa ry’abanyamuryango bakorerwa n’abayoboye amakoperative, Tumukunde yavuze ko amahame avuga ko buri munyamuryango afite uburenganzira bungana n’ubwundi, bose bafite imigabane ingana akaba yasabye abanyamuryango bose kubahiriza amahame abagenga.

Munyanganizi Gaju waje ahagarariye RGB yavuze ko Urwego rw’Igihugu rw’Imiyoborere rufatanyije n’Ikigo cy’Igihugu cy’Amakoperative (RCA) baje kwegera abayoboye amakoperative ngo barebere hamwe ibibazo biri mu makoperative maze babikemurire hamwe.

“Nk’uwikorera” ni gahunda nshya ya RGB ikaba igamije gushishikariza inzego zitandukanye gukora nk’abikorera bakabasha gutanga service nziza ku babagana kugira ngo imiyoborere yabo irusheho guteza imbere ibigo bayoboye.
Patrick RURINDA

Yisangize Inshuti.

Ibitekerezo

Tanga Igitekerezo