Abatuye mu gikobwa muri Gatsibo bumvishijwe icyanga cy’ubukerarugendo bubakirwa amashuri

Abaturage batuye mu karere ka Gatsibo mu murenge wa Rwimbogo baturiye pariki y’Akagera bubakiwe amashuri y’imyaka itatu ibanza basabwa gufata neza pariki kuko ubukerarugendo aribwo bukungu bw’ibanze bw’igihugu.

Aya mashuri yubakiwe abaturage batuye muri uyu Murenge muri gahunda isanzwe ikorwa na leta y’u Rwanda ibicishije mu kigo cy’igihugu gishinzwe iterambere RDB mu gashami kayo gashinzwe ubukerarugendo.

Ni gahunda yo kubakira ibikorwa remezo abaturage baturiye amapariki mu rwego rwo kugezwaho umusaruro uva mu ma pariki . Kugeza ubu leta y’u Rwanda yageneraga aba baturage abafaranga angana na 5% mu yavuye mu bukerarugendo ariko yariyongereye agera ku 10 %.

Kaliza Belise, Umuyobozi ushinzwe ubukerarugendo muri RDB yabwiye aba baturage ko byari ngombwa ko babubakira amashuri kubera ubwigunge bari barimo.

Ati :”Nk’uko wabibonye n’abana badukiniye agakino kagaragaza ko nabo bazi akamaro ko kubungabunga pariki, ibinyabuzima byayo ndetse n’ababyeyi ubahagarariye wabyumvise ko yashimiye avuga uko mbere bari bigunze abana bato b’imyaka 6 bagendaga ibirometero birenga 10 bajya ku ishuri byanatumaga bamwe bava mu ishuri abandi bakiga nabi. Twasanze rero ari ngombwa kubaka amashuri hano.”


Nubwo bakiri bato aba bana bagendaga ibirometero bisaga 7 bajya gushaka aho biga

Umunyamabanga uhoraho muri Minsiteri y’uburezi Murindwa Samuel wanatashye aya mashuri ku mugaragaro, yabwiye aba baturage ko ubukerugero ari zababu y’u Rwanda bityo ko bakwiye kububungabunga.

Ati “Ubukerarugendo nicyo kintu cyinjiza amafaranga menshi mu gihugu cyacu kiruta ikindi icyo ari cyo cyose. Amafanga yubaka imihanda, amashuri n’ibindi bikorwa by’iterambere ava mu bukerarugendo, niyo zahabu dufite. Rero mwebwe abaturiye iyo mpano Imana yaduhaye turabasaba ko muyirinda, ni ikirezi mwambaye mugomba kurinda.”

Murindwa yavuze ko Minisiteri y’uburezi nayo izashaka abarimu bafite ubumenyi buhagije bwo kwigisha abana bo muri iri shuri.

Iri shuri rifite ibyumba bine bizigirwamo abanyeshuri biga mu mashuri abanza kugeza mu mwaka wa gatatu ariko hakaba mbere hari habanje kubakwa ibindi bibiri bizigiramo abana b’incuke.

Uretse abaturage baturiye Pariki y’Akagera, RDB vuba aha izataha n’ibindi bikorwa yubakiye n’abandi baturage baturiye Pariki zirimo iya Nyungwe ndetse n’iy’Ibirunga.

Yisangize Inshuti.

Ibitekerezo

Tanga Igitekerezo