Abanyamuryango b’amakoperative na bo bafite uruhare mu kunyunyuzwa n’abayayobora

1

Abamotari barashinjwa kwanga kwitabira inteko rusange za Koperative no kuba ba ntibindeba mu micungire y’amakoperative babarizwamo.

Ikigo cy’igihugu gishinzwe amakoperative mu Rwanda (RCA) kiratunga agatoki abanyamuryango b’amakoperative kuba ba ntibindeba mu kugenzura no gukurikirana umutungo bashyira muri koperative bakabihariha abayobozi bakabaha icyuho cyo kuwukoresha uko bishakiye.

Ikibazo cy’imicungire y’amakoperative mu Rwanda cyagiye kivugwa inshuro nyinshi ndetse mu minsi ishize abayobozi bo mu nzego zitandukanye bahuriye mu nteko ishinga amategeko ngo bige ku buryo iki kibazo cyakemuka cyane cyane mu makoperative y’abamotari.

Iki kibazo ahanini gishingiye ku kuba abayobozi b’aya makoperatibe bakoresha umutungo wa koperative nkaho ari uwabo bwite bakawukoresha uko bishakiye badakurikije amategeko agenga amakoperative yashyizweho na RCA.

Bizimana Deogratius, Umuyobozi muri RCA, mu kiganiro Isi ya none cyatambutse kuri RBA ku mugoroba wo kuri uyu wa 15 Gicurasi, yavuze ko nubwo hari abayobozi bakora nabi, abanyamuryango na bo bagira uruhare mu kubaha urwaho rwo kunyereza no gukoresha nabi imitungo ya koperative bitewe nuko bumva gukurikirana umutungo wabo bisa n’aho bitabareba kandi nyamara ngo ni bo bawufiteho ububasha bukomeye .

Bizimana yagize ati: “Ikibazo cy’imicungire mibi y’amakoperative kirahari ariko gishingiye ku mpamvu ebyiri, abanyamuryango benshi ntibarumva ko koperative ari iyabo bityo abayobozi bagakora ibyo bishakiye, itegeko riteganya ko inama y’inteko rusange igomba kuba kabiri mu mwaka ariko hari ubwo iyo nama iba abanyamuryango ntibayitabire kandi bakagombye kuza bakavuga ibibazo birimo”

“...Ikindi cya kabiri hari abayobozi na bo bajyaho bagakora amakosa bitwaje icyo cyuho cy’abo banyamuryango bataza mu nama kuko babona ko abanyamuryango batitaye kuri Koperative bagakora ibyo bashaka”

Uyu muyobozi muri RCA avuga ko abanyamuryango ubwabo bafite ububasha bwo gushyiraho abayobozi bakora neza no kweguza abakora nabi. Ati: “Muri koperative hari inzego zihari, inteko rusange, inama y’ubuyobozi n’inama y’ubugenzuzi, Buriya inteko rusange niyo iba iri hejuru y’inzego zose,… iyo inteko rusange rero ititabirwa, inama y’ubuyobozi urumva ikora nabi.”

Avuga ko izi nzego zuzuzanya ariko ko iyo rumwe muri zo rucitse intege bitera izindi nzego kwirara zigakora uko zishatse.

Ezekiel uyoboye by’agateganyo Koperative y’abamotari Twiyubake nyuma yuko uwayiyoboraga ashinjwe kunyereza umutungo avuga ko hari aho abaperezida b’amakoperative bayakoresha nkaho ari uturima twabo kuko bayayobora uko babyumva badakurikije amategeko agenga Koperative ariko na we agashinja abanyamuryango kuba nyirabayazana w’iyo mikorere mibi y’abayobozi.

Ati: “Hari inama twagiye duhamagaza ariko abanyamuryango bakabura, kuko rero hari abanyamuryango bateganywa n’itegeko kugirango inama ibe, ubwo umubare utagerwaho tukongera tugasubirayo, iyo hari abayobozi babi rero baba babonye icyuho cyo kunyereza wa mutungo, bivuze ngo abanyamuruyango na bo ubwabo hari ibyo bagiramo uruhare.” Yavuze ko usanga hari abamara imyaka itatu bataritabira inteko rusange.

Ikindi Bizimana yagarutseho ni uko hari abanyamuryango bahishira abayobozi bakora nabi kandi nyamara iyo babagaragaje bafatirwa ingamba.

Ati: “banyamuryango nibo pfundo ry’imizamukire ya koperative, agomba kuyigira iye, akayikorerera, akitabira ibikorwa byayo, agatanga ibitekerezo ku buryo wa muyobozi uhari anagira ubwoba bwo kunyereza umutungo kuko azi ko hari ijisho riri kumureba, abanyamuryango bagombye gushishoza, babona arimo gusobanya bakamugira inama babona atikosora bakamushyira ku ruhande cyangwa bakatubwira.

…Iyo yanyereje umutungo turahagera tugakora Raporo tukayisomera abanyamuryango noneho tugakora dosiye tukayishyikiriza ubushinjacyaha, iyo basanze yaranyereje umutungo arawuryozwa.”

Ikindi kibazo kigaragara ku banyamuryango ni uko hari abatanga umugabane shingiro ariko ugasanga badatanga imisanzu nkuko bikwiye bigatuma n’abandi bacika intege. Hari kandi ahakigaragara akazu mu miyoborere y’amakoperative aho usanga hari iziyobowe n’abantu bahuje amasano kandi itegeko ritabyemera.

Bizimana yavuze ko kuri ubu mu Rwanda habarurwa amakoperative 8,372 afite imari shingiro isaga Miliyari 38, muri aya makoperative habarurwamo abagabo bakabakaba miliyoni ebyiri ndentse n’abagore basaga Miliyoni n’ibihumbi Magana ane.

Mu Rwanda kuri uyu wa 15 Gicurasi, hatangijwe icyumweru cyo guteza imbere amakoperative hagamijwe gukemura ibibazo biyagaragaramo akenshi biba bishingiye ku micungire mibi.

RCA mu nshingano zayo ifite ubushobozi bwo kugenzura imikorere y’amakoperative, gufasha amakoperative kwiteza imbere bayaha inama z’imikorere, kuyaha ubuzima gatozi, kuyaha amahugurwa, gukurikirana abanyereza umutungo wa koperative bakabashyikiriza ubutabera bakawuryozwa.

Izindi nkuru bijyanye:

Akavuyo n’akajagari mu bamotari byatumye abadepite bitabaza Guverinoma

Abadepite bababajwe no gutumira abayobora amakoperative y’abamotari hakazamo n’ abirukanwe

Ikibazo cy’inyeshyamba mu bamotari n’abafite moto aribo bashinzwe kuzigenzura byibajijweho mu nteko

Amwe mu makoperative y’abamotari arashinjwa kuyoborwa na ba rusahurira mu nduru

Yisangize Inshuti.

Ibitekerezo 1

  1. Ni byo koko abayoborwa bagira uruhare mu gutuma abayobozi babo babakandamiza.Ibyemezo byinshi Leta ifata bidakwiye kugeza kurandura imyaka,gusenya amazu,kurasa abantu nyamara bari mumaboko ya Polisi,maze twese tukicecekera.... NITWE DUTUMA BYOSE BIKOMEZA KUBAHO.

Tanga Igitekerezo