Abahoze bacururiza mu isoko rya Gikondo bagiye kongera kwimurwa

Abimukiye muri iri soko rya Karugira bagiye kongera kwimurwa

Abacururi bahoze bacururiza mu isoko rya Gikondo nyuma bakaza kwimurirwa mu kindi kibanza kiri mu Kagali ka Karugira, Umurenge wa Kigarama Akarere ka Kicukiro, ubu bagiye gushakirwa ahandi baba bakorera.

Muri Mutarama 2013 nibwo abakoreraga mu isoko rya Gikondo bimuriwe mu kagali ka Karugira ahari habonetse ikibanza.Bari bimuwe kugirango hubakwe isoko rigezweho rya Gikondo.

Abo bacuruzi bimuwe bizezwa ko mu mezi 15 bazaba bagarutse mu isoko bahozemo nyuma yo kuryubaka bijyanye n’igihe.

Kugeza na n’ubu isoko rya Gikondo ntiriruzura.Ryagiye rihabwa abashoramari batandukanye ngo baryubake ariko byarananiranye.

Ubuyobozi bw’Umujyi wa Kigali bwatangaje ko buri gushaka abandi bashoramari bashobora kuryubaka rikuzura ngo kuko abarihawe mbere ryabananiye.

Abimuriwe Karugira nabo bose ntibabonye ibibanza, n’ababibonye ni bito ndetse bavuga ko aho bahawe ari habi abakiliya bibagora kuhagera, imvura yagwa ikabanyagira n’ibindi.

Nyamulinda Pascal, Meya w’Umujyi wa Kigali kuri uyu wa Kane mu kiganiro n’abanyamakuru yavuze ko bari gushaka ikibanza cyisanzuye kandi kiri ahantu heza bazimuriramo abo bacuruzi bahoze mu isoko rya Gikondo.

Yagize ati “Isoko rya Gikondo nibyo ryagize ikibazo.Ryagize ikibazo cy’umushoramari wananiwe kurangiza kuryubaka.Abacururiza muri iryo soko bafite ikibazo kuko ntibafite aho bakorera ubu, aho bakorera ngirango ni ikibanza gito cyane ku buryo batahishimiye ariko turimo tutavugana n’Akarere ka Kicukiro kugirango turebe uburyo twabashakira ahantu baba bakorera by’agateganyo, tuhashyire isoko noneho igihe tuzabonera undi mushoramari uzubaka ririya soko azarirangize ariko nibura uko ikibazo giteye ubu babe babonye aho bakorera.”

Meya Nyamulinda yavuze ko Akarere ka Kicukiro kamaze kubona ikibanza, hakaba hategerejwe isuzuma ry’Umujyi wa Kigali ngo wemeze niba koko icyo kibanza cyajyamo isoko.

Iri soko rimaze imyaka ine rimaze kubakwaho na ba rwiyemezamirimo bagera kuri babiri bose bananirwa.Hari nubwo ryashatse gutezwa cyamunara ariko bigenda binanirana kubera impamvu zitandukanye zirimo n’ibiciro bihanitse.

Yisangize Inshuti.

Ibitekerezo

Tanga Igitekerezo