66% by’ingengo y’imari ya 2017/2018 azava mu gihugu, ay’Imisoro aziyongeraho Miliyari 118.9

3

Mu rwego rwo guharanira kwigira no kwihesha agaciro, mu ngengo 2017/2018 , u Rwanda rwongereye ingano y’amafaranga ava mu gihugu imbere rugabanya amafaranga aturuka mu mahanga agera kuri 17.3%.

Kiri uyu wa 08 Kamena 2017, Minisitiri w’imari n’igenamigambi Amb Gatete Claver yagejeje ku bagize inteko ishinga amategeko imitwe yombi umushinga w’itegeko rigena ingengo y’imari y’umwaka wa 2017/18.

Iyi ngengo y’imari ingana na Miliyari 2,094.9 z’amafaranga y’u Rwanda, ikaba yariyongereyeho agera kuri Miliyari140.7 bingana na 7% ugereranyije na Miliyari 1,954.2 yari mu ngengo y’imari ivuguruye ya 2016/2017.

Minisitiri Amb Gatete yavuze ko amafaranga ateganyijwe kwinjira ava imbere mu gihugu angana na Miliyari 1,375.4 z’amafaranga y’u Rwanda aribyo bingana na 66%. Akaba aziyongeraho agera kuri Miliyari 134.3 ugereranyije na Miliyari 1241.1 yari mu ngengo y’imari ivuguruye ya 2016/2017.

Muri aya azava mu gihugu, azakomoka ku misoro ateganyijwe kugera kuri Miliyari 1,200.3 akaba aziyongeraho agera kuri Miliyari 118.9. Amafaranga akomoka ku bindi bitari imisoro ateganyijwe kungana na Miliyari 139.0.

Amafaranga azaturuka ku nguzanyo zo hanze y’igihugu ateganyijwe kugera kuri Miliyari 362.8 bingana na 17.3% by’ingengo y’imari yose.

Agaruka ku buryo iyi ngengo y’imari igaragaza ko u Rwanda ruri mu nzira nziza yo kwigira, Minisitiri Gatete yavuze ko "Amafaranga ava imbere mu gihugu wongeyeho inguzanyo zizaturuka mu gihugu angana na Miliyari 1,738.2 bingana na 83% by’ingengo y’imari yose mu gihe Inkunga z’amahanga ziteganyijwe kungana na Miliyari 356.7 z’amafaranga y’u Rwanda bingana na 17 ku ijana by’ingengo y’imri yose ari byo byerekana ko u Rwanda ruri mu murongo mwiza rwihaye wa gahunda yo kwigira.”

Uko amafaranga azakoreshwa

Ingengo y’imari yagenewe ibikorwa bisanzwe izagera kuri Miliyari 1,125 Frw bingana na 54% by’ingengo y’imari yose ya 2017/2018. Ikaziyongeraho Miliyali 131 FRW ugereranyije na Miliyari 994 Frw muri 2016/2017. Iyi nyongera ku ngengo y’imari isanzwe izafasha mu bikorwa byo gutegura amatora no guteganya amafaranga y’imishara izahabwa abakozi bo mu bigo bishya.

Amafaranga azakoreshwa mu mishinga y’iterambere 2017/2018 angana na Miliyari 772, 7 akazagabanyukaho Miliyari 5.2 ugereranyije na Miliyari 777, 9 yakoreshejwe mu ngengo y’imari ya 2016/2017.

Amafaranga ateganyijwe gukoreshwa mu mishinga y’iterambere n’ishoramari rya Leta mu bikorwa by’ubucuruzi azagera kuri Miliyari 931 bingana na 44.4% by’ingengo y’imari yose. Ibikorwa bizibandwaho muri iyi mishinga ni ukongera umusaruro w’ibicuruzwa byoherezwa mu mahanga harimo kongera umusaruro w’imbuto, indabo, icyayi. Hari kandi gukomeza gutegura no kwakira inama mpuzamahanga.

Urwego rw’ubuhinzi rwagenewe amafaranga agera kuri Miliyari 110.5 z’amafaranga y’u Rwanda azakoreshwa mu bikorwa by’ingenzi birimo guhangana n’amapfa hongerwa ibikorwa byo kuhira imirima, kongera umusaruro w’ubworozi, gutubura imbuto no gutanga ifumbire.

Urwego rw’ingufu rwagenewe amafaranga y’u Rwanda agera kuri Miliyari 84 zikazakoreshwa ibikorwa bitandukanye birimo kwagura imiyoboro y’amashanyarazi, no kongera uburyo busimbura inkwi mu guteka.

Gutwara abantu n’ibintu byagenewe amafaranga agera kuri Miliyari 248.5 azakoreshwa ibikorwa birimo kubaka ikibuga cy’indege cya Bugesera, kwagura ikibuga cy’indege cya Kigali n’icya Kamembe, ndetse no kwagura ingendo za RwandAir, gusana no kwagura imihanda, kunoza uburyo bwo gutwara abantu mu modoka rusange n’ibindi.

Amazi, isuku n’isukura byagenewe Miliyari 30.4 akazakoreshwa mu gukora imishinga yo kongera amazi meza no gusana imiyoboro y’amazi no kwegereza abaturage bo mu cyaro amazi meza ku kigero cyo hejuru.

Urwego rw’ubuzima rwagenewe amafaranga y’u Rwanda agera kuri Miliyari 193.6 y’u Rwanda akazakoreshwa mu kubaka ibikorwa byo kwegereza abaturage serivise z’ubuvuzi no kurwanya imirire mibi ndetse no kugwingira kw’abana no kongera ubushobozi bw’abakozi bakora mu buzima.

Uburezi bwagenewe amafaranga y’u Rwanda agera kuri Miliyari 248.5 azakoreshwa mu gusana amashuri, kwita ku ireme ry’uburezi, kongerera ubumenyi abarimu, kongera ibikoresho n’amashuri y’imyuga no gufasha kaminuza y’u Rwanda kwiyubaka.

Yisangize Inshuti.

Ibitekerezo 3

Tanga Igitekerezo