Nsengiyumva Fulgence avuga ko bishoboka guhangana n’amapfa avugwa mu gihugu

1

Mu bice binyuranye by’igihugu hagiye humvikana amapfa yateye benshi gusonza ndetse abandi barasuhuka kubera imihindagurikire y’ikirere itarabaye myiza mu bihembwe bitandukanye by’ihinga mu mwaka wa 2015-2016.

Nubwo hirya no hino havugwa amapfa ariko ntibyabujije Minisiteri y’ubuhinzi n’ubworozi n’izindi nzego kwizihiza umunsi mpuzamahanga w’ibiribwa ku isi mu karere ka Huye, mu murenge wa Gishamvu kuwa 20 Ukwakira 2016.

Umunyamabanga wa Leta muri Minisiteri y’Ubuhinzi n’Ubworozi, Nsengiyumva Fulgence, yavuze ko bitashoboka guhagarika imihindagurikire y’ikirere ariko bishoboka gutegura guhangana n’ingaruka zabyo.

Ati “Hari ibintu bibiri, iyo imvura yabaye nyinshi iraza ikica ibintu, yamara kugenda yabuze tukaba tuyikeneye nk’amazi akoreshwa mu buhinzi.Igikorwa rero ni ukugira ngo twitegure niba nyinshi isange hari ibikorwa bishobora gutuma ingaruka zayo zidashobora kugira ingaruka mbi ari ku buhinzi ari no ku bantu muri rusange”

Nsengiyumva yakomeje agira ati “ Igihe yabuze nabwo dukoreshe buriya buryo bwo kuhira imyaka , ahari amazi tube twayakoresha igihe imvura idahari tubone umusaruro ya mirire twari dusanganywe ikomeze nubwo imvura yabuze”.

Avuga ko mu gihe imvura yabaye nyinshi ikwiye gusanga haraciwe imirwanyasuri ndetse n’imiyoboro y’amazi aho adashobora kwangiza.

Abana bagera kuri 38% mu Rwanda bafite ikibazo cyo kugwingira baterwa n’imirire mibi naho miliyoni zisaga 800 zugarijwe n’ikibazo cyo kutagira ibibatunga, aho u Rwanda rwagiye rufata ingamba zitandukanye zo kurwanya imirire mibi harimo no gushyiraho gahunda ya Girinka no kwigisha abaturage gukora uturima tw’igikoni ku buryo rwifuza ko mu mwaka wa 2018 abafite ikibazo cy’imirire mibi bazaba bageze kuri 18%.

Nubwo inzara yagiye ivugwa ariko Guverinoma y’u Rwanda ntiyagiye yemeranya n’abavuga ko mu Rwanda hari inzara bagendeye ko nta mibare y’abantu bigeze bapfa bayizize. Gusa Minisitiri w’Ubuhinzi n’Ubworozi, Mukeshimana Gerardine yigeze kuvuga ko nta nzara iri mu Rwanda ahubwo ari amapfa.

Gusa yemeye ko hari uturere two mu Ntara y’Uburasirazuba twagaragayemo izuba rikabije ryagize ingaruka zikomeye ku buhinzi nko mu karere ka Kirehe, Ngoma na Nyagatare.

@Eric Birori

Yisangize Inshuti.

Ibitekerezo 1

  1. Nzaramba bavuga igomba kuramba koko.Impamvu zirahari,turazibona twe mu cyaro.Leta izemera ukuri ari uko amazi yarenze inkombe??

Tanga Igitekerezo