Urubyiruko rusiga ubuhinzi rukirukira akazi ko mu biro rwanenzwe

1

Tony Nsanganira umunyamabanga wa Leta muri Minisiteri y’Ubuhinzi n’Ubworozi

Mu nama mpuzabikorwa ku buhinzi n’ubworozi, umunyamabanga wa Leta muri Ministeri y’ubuhinzi n’ubworozi Tonny nsanganira yahwituye urubyiruko rwihutira gushaka akazi ko mu biro aho kwibumbira hamwe ngo bakore ubuhinzi n’ubworozi.

Kuri uyu wa kane tariki 1 Nzeli 2016, i Kigali hateraniye inama mpuzabikorwa ku buhinzi n’ubworozi yahuje Minisiteri y’ubuhinzi n’ubworozi, ibigo bifite aho bihurira n’ubuhinzi n’ubworozi, abayobozi ku nzego z’uturerere ndetse n’abahinzi borozi bo mu mujyi wa Kigali.

Zimwe mu ngingo nyamukuru zibanzweho muri iyi nama, harimo kureba uko ubuhinzi n’ubworozi bwagenze mu mwaka w’ihinga 2015-2016 ndetse no gushyiraho gahunda y’impinduramatwara mu gihembwe cy’ihinga kigiye gutangira.

Muri iyi nama kandi hagarutswe ku gukangurira abahinzi gukoresha ifumbire ndetse n’imbuto bitanga umusaruro kugira ngo iki gihembwe cy’ihinga kigiye gutangira kizatange umusaruro uhagije.

Nyuma yo kugaragara ko abenshi bakora ubuhinzi n’ubworozi bafite guhera ku myaka 50, hanenzwe urubyiruko usanga radakunda kwibumbira mu makoperative y’ubuhinzi n’ubworozi ahubwo ugasanga bibanda cyane ku gushaka akandi kazi.

Umunyamabanga wa Leta muri Ministeri y’ubuhinzi n’ubworozi Tonny Nsanganira yakebuye urubyiruko usanga ahanini rwihutira kujya gushaka akandi kazi aho gukora ubuhinzi n’ubworozi kandi byoroshye.

Yagize ati: "Gukora ubuhinzi n’ubworozi byaroroshye, kuri ubu ushobora gukora ubuhinzi n’ubworozi wibereye iwawe muri salo, ukoresha telekomande kugira ngo wuhire imyaka, ushobora gukoresha imashini ihinga nta gufata isuka. murumva ko ubuhinzi nabwo busigaye bukorwa ku buryo bw’ikoranabuhanga."

Nsanganira yasabye urubyiruko rwize ibijyanye n’ubuhinzi no kuvura amatungo ko bakwegera amakoperative y’ubuhinzi n’ubworozi bakaba bakorana n’urundi rubyiruko bakaruhitura, aho kwihutira gushaka akazi ko mu biro.

Yisangize Inshuti.

Ibitekerezo 1

  1. Ikibazo nuko izo mashini zihenze kuzikodesha zikaba zitanaboneka ku buryo bworoshye ibikorwa remezo byuhira imusozi nabyo ni bicye cyane nko muri Bugesera.Murakoze

Tanga Igitekerezo