Kamonyi: Abahinzi ba kawa bijejwe ubufasha n’akarere ku bibazo byabacaga intege

1

Abahinzi ba kawa bakorera mu Mudugudu wa Rugarama, mu Kagari ka Kabuga, mu Murenge wa Ngamba, mu Karere ka Kamonyi, bijejwe ko bagiye gukorerwa ubuvugizi ku buryo igiciro cya kawa ku kilo kiziyongera bityo ubu buhinzi bukarushaho kubateza imbere.

Ibi Umuyobozi w’Akarere Wungirije Ushinzwe iterambere ry’ubukungu yabivuze mu gikorwa cyo gutangiza ku mugaragaro, gahunda yo gukorera kawa kuri uyu wa gatanu tariki ya 22 Nyakanga 2016.

MUNGANYIMANA Bertin umwe mu bahinzi bafite ibipimo bya kawa binini mu Murenge wa Ngamba, yavuze ko abahinzi bamaze kumenya neza akamaro k’iki gihingwa ku buryo byabateje imbere mu mibereho yabo ya buri munsi.

Uyu muhinzi wa kawa yagize ati” iyo tuganiriye n’abahinzi bagenzi banjye bakubwira ko kawa ari igihingwa cy’ingirakamaro kandi ko nta kindi gihingwa bayisimbuza”.

MUNGANYIMANA Bertin avuga ko ibyo bitanga icyizere cy’uko umusaruro wa kawa uzakomeza kwiyongera ndetse n’ubwiza bwayo bugakomeza kwitabwaho kuko buri wese aba yitaye ku guharanira iterambere ry’umuryango we n’igihugu muri rusange.

Yakomeje avuga kandi ko habayeho kongera igiciro cya kawa byafasha abahinzi kandi ko byanatuma bagira umuhate wisumbuyeho mu kuyikorera no kuyifata neza ugereranyije n’uko babikora ubu.

Ashingiye ku busabe bw’abahinzi ba kawa bakorera muri uyu Murenge, Thaddee TUYIZERE Umuyobozi w’Akarere wungirije ushinzwe Iterambere ry’Ubukungu mu Karere ka Kamonyi, yavuze ko ibyifuzo by’abaturage bamugejejeho bagiye kubiganiraho n’ubuyobozi bw’Ikigo Gishinzwe Kohereza mu Mahanga ibihingwa ngengabukungu no Guteza imbere umusaruro w’Ibikomoka ku Buhinzi NAEB, kugira ngo harebwe icyakorwa.

Uyu muyobozi yagize ati” Niba hari aho ikilo [1kg] cya kawa kigura amafaranga 250 nkuko abahinzi babivuga kandi hano bakaba bishyurwa amafaranga 170 ku kilo, tugiye kureba niba ibyo koko ari ukuri hanyuma dukore ubuvugizi ku buryo ibi bintu byakosorwa.”

Gusa nubwo abahinzi ba kawa bavuga ko igiciro cy’ibitumbwe basarura mu mirima yabo kikiri hasi, umuyobozi w’Akarere Wungirije Ushinzwe Ubukungu yabasabye ko bakomeza gukorera neza kawa, ku buryo yagumana umwimerere wayo mu ruhando mpuzamahanga bityo n’igihugu kikabyungukiramo bifatika.

Uyu muyobozi yongeyeho ko kugira ngo kawa igirire umuturage akamaro bisaba ubufatanye bwa buri rwego bityo hakabaho gusenyera umugozi umwe mu kongera umusaruro wa kawa y’u Rwanda n’ubwiza bwayo.

Pontien MUNYANKERA wari uhagarariye NAEB muri iki gikorwa, yavuze ko ibiciro bya kawa imbere mu gihugu bifatira ku biciro ku isoko mpuzamahanga, ku buryo kugira ngo hashyirweho igiciro runaka biterwa n’uburyo kawa y’u Rwanda ihagaze mu mahanga.

Yakomeje ashimangira ko mu kigo cyabo gifite ibihingwa ngengabukungu mu nshingano, bagiye gukomeza kubikurikirana ku buryo igiciro cya kawa kizagenda buhoro buhoro gihuzwa n’igihe, bityo imibereho y’abakora ubu buhinzi ikarushaho gutera imbere.

Yisangize Inshuti.

Ibitekerezo 1

Tanga Igitekerezo