Burera: Abahinga ibirayi barataka igihombo gikomeye gishobora kubateza inzara

1

Bamwe mu bahinzi b’ibirayi bo mu murenge wa Rugarama, akarere ka Burera, mu ntara y’Amajyaruguru, baravuga ko bafite ikibazo bita ko gikomeye cyo kubura isoko ry’umusaruro w’ibirayi byabo kubera ko ari cyo gihingwa kibafatiye runini mu buzima bwabo ndetse ngo bakaba nta n’uruganda rwabafasha gutunganya umusaruro wabo bafite.

Aba baturage bavuga ko muri uyu murenge nta kindi gihingwa kihera uretse ibirayi bisimburana n’ingano. Bavuga ko abatuye by’umwihariko mu tugali twa Karangara na Cyahi ari bo beza ibirayi kurusha abandi, none ubu ngo ntibakibona abantu baza babagana nka mbere nkuko byahoze baje kubagurira ibirayi.

Aba baturage kandi bemeza ko mbere ngo bajyaga babona abantu baturuka I Kigali n’ahandi hantu hatandukanye baje kubigura, none ubu ngo ntibazi igituma batakiza.

Ibi ngo bituma hari abantu basigaye birirwa mu baturage babashuka kugira ngo babahende babagurira ku giciro gito, bityo bigatuma bakorera mu gihombo aho gutera imbere nkuko baba babyifuza. Ikindi aba baturage bagarukaho ngo ni ukuba abaturage bose bereza rimwe ibirayi bitewe n’uko bose ari byo bahinga, noneho igihe cyo gusarura bakabikurira icyarimwe bityo ugasanga kubera inyota y’amafaranga baba bafite babigurisha kuri make.

Ntahonkiriye Felicien utuye mu kagali ka Cyahi avuga ko iki kibazo kigenda gifata intera ikomeye cyane kuko ubu ngo igiciro cyavuye ku mafaranga 150 ku kiro none ubu kikaba kigeze kuri 80 bitewe no kudashyira hamwe kw’abaturage kuko ngo buri wese yirwanaho.

Yagize ati:” Rwose nimudutabarize badufashe kuko ubu turi kweza ibirayi byinshi, ariko bigapfa ubusa kubera kubiburira isoko bikaduteza igihombo gikabije. Twese aha uko mutubona duhinga ibirayi bikerera rimwe ugasanga bipfuye ubusa kubera kubura abaguzi. Ntabwo bakiza pe! Nabaje baratwihererana bakatugurira kuri make.”

Burasiye Jean Bosco na we uhinga ibirayi nk’uwabigize umwuga muri aka gace, avuga ko kuba batakibona isoko ry’ibirayi ku rundi ruhande ngo biterwa no kuba nta ruganda bafite muri aka gace rwabafasha gutunganya umusaruro wabo kuburyo byanaborohera kubibonera isoko no hanze y’igihugu.

Yagize ati:” Twe rwose icyo dukeneye aha ni uruganda rutunganya umusaruro w’ibirayi nkuko bigenda no mu bindi. Ibi byanadufasha guca abamamyi birirwa bashuka abaturage bikanatworohera kubona isoko kuko urwo ruganda rwajya rutugurira isoko rikaguka rikanagera hanze y’u Rwanda.”

Ku ruhande rw’ubuyobozi bw’umurenge wa Rugarama, umukozi ushinzwe ubuhinzi muri uyu murenge Dukuzumuremyi Pierre Roger we asanga hari uburyo iki kibazo cyakemuka. Avuga ko aho kwirirwa bagurisha ibirayi byabo mu bamamyi ngo aba baturage bagomba kwitabira umuco wo guhunika, kuko ngo ni byo byabafasha kurushaho.

Yagize ati:” Ubu ndababwiza ukuri ko dufite abakire baturuka za Gicumbi, Uganda n’ahandi baza kugura imbuto y’ibirayi hano muri uyu murenge. Byaba byiza rero buri wese yajya ahunika noneho mu kugurisha amafaranga aba yazamutse kuko ikiro cy’imbuto y’ibirayi igera mu mafaranga y’u Rwanda 350.”

Icyakora n’ubwo uyu muyobozi avuga ko guhunika ari cyo cyaba igisubizo, hari abaturage bavuga ko hari ibirayi bahunitse none ngo ubu byose ngo byaraboze, bagasaba ko ahubwo niba uruganda rutabonetse, hashyirwaho ubuhunikiro rusange kugira ngo bakomeze guhangana nabo bamamyi babagusha mu gihombo.

Kayitsinga Faustin, umunyamabanga nshingwabikorwa w’umurenge wa Rugarama, avuga ko kuba bahingira icya rimwe nta kibazo kirimo, ahubwo akavuga ko abaturage rimwe na rimwe usanga batubahiriza inama bahabwa zirimo guhunika ndetse n’ibindi.

Akomeza anavuga ko atazi impamvu abaturage bavuga ko babuze isoko kandi ngo ibirayi bya Kinigi byambuka umunsi ku wundi bijya hanze.

Yagize ati:” Ibyo bavuga byo gushaka uruganda sinumva ko ari cyo cyaba igisubizo, dufite ahantu hatandukanye hano mu murenge wacu hagurishirizwa ibirayi, ibirayi buri munsi birambuka bijya hanze kandi n’ubuyobozi turabikurikirana. Icyo nababwira ni uko bagomba gukurikiza inama bagirwa, n’urwo ruganda bavuga rwose ubu tuvugana rugiye gutangira kandi bizagenda neza.”

Mu minsi ishize ibirayi byigeze guhenda ndetse biranabura hirya no hino mu guhugu, icyo abayobozi basobanuraga ni uko ngo isoko ryagutse bikaba bijyanwa hanze, ariko Leta yagiye ifata ingamba zo gukumira kubyohereza cyane hirindwa ko hazaba ikibazo cyo kubura kwabyo burundu.

Muneza Ferdinand

Makuruki.rw

Yisangize Inshuti.

Ibitekerezo 1

  1. Ubuse umuntu wakoze iyinkuru koko Mana we! !!! niba harikintu gihenze murikigali nibirayi ubwose ababaturage bo baravuga ukuri cg iyi nkuru yakozwe na Minister wa agriculture kugirango yumvishe abantuko mu Rwanda ntanzara ihari? ?? Sha mugere mumasoko yose ya Kigali murabonako iyinkuru atariyo!

Tanga Igitekerezo