MINAGRI ntikozwa iby’abahungira I Bugande kubera inzara

2

Hashize iminsi mu Rwanda bivugwa ko agace k’iburasirazuba bw’u Rwanda by’umwihariko mu turere twa Kayonza na Nyagatare twibasiwe n’amapfa, bigatuma abadutuye kuri ubu baratangiye gusuhukira mu gihugu cya Uganda, gusa Minisiteri y’ubuhinzi yo irahaka ko aba bajyanwa n’inzara.

Ubwo yasozaga itorero ry’abafite aho bahurira n’ubuhinzi ryiswe Ingamburuzabukene, Minisitiri w’intebe nawe yagarutse kuri iki kibazo avuga ko aka gace koko kibasiwe n’amapfa, anasaba abashinzwe ubuhinzi n’ubworozi kongera imbaraga mu byo bakora kugira ngo bajye bahangana n’ibibazo nkibi bagira inama abaturage nkuko biri mu nshingano zabo.

Mu kiganiro yagiranye n’abanyamakuru kuri uyu wa mbere tariki 11 Nyakanga 2016, Minisitiri w’ubuhinzi n’ubworozi mu Rwanda, Dr Geraldine Mukeshimana, nawe ntahakana ko mu burasirazuba bw’u Rwanda hari amapfa, ariko akavuga ko iki kibazo cy’amapfa cyatewe n’izuba ryinshi, ariko ngo si u Rwanda gusa rufite icyo kibazo kuko ngo miliyoni 50 z’Abanyafurika zifite ikibazo cy’ibiryo bidahagije.

Mukeshimana yemeza ko imiryango 47306 mu Rwanda hose idafite ibiribwa bihagije, byatumye Leta ishyiraho gahunda yo kubaha ibibatunga.

Gusa Minisitiri Mukeshimana yavuze ko mu Rwanda hari amapfa aho kuba izara nkuko ibinyamakuru bibitangaza.

Uyu muyobozi kandi yahakanye yivuye inyuma ibivugwa ko hari abanyarwanda basuhukiye muri Uganda bahunga inzara, avuga ko ibyo batabizi, ahubwo akemeza ko abagiye muri iki gihugu bashobora kuba baragiye gushaka akazi nk’uko babyemerewe nk’abandi baturage bo mu bihugu byo muri aka karere.

Yagize ati “Niba mu binyamakuru mwarabyanditse mufite gihamya, twebwe ntayo dufite. Umuntu wese ushaka akazi yemerewe gukora mu gihugu ashaka muri aka karere. Niba I Nyagatare batagusha imvura ntacyo waba uhakora, ahubwo ujya mu Majyaruguru cyangwa Amajyepfo aho igwa. Kugenda kw’abantu ntabwo ku bwanjye ari ikibazo kandi niba mwebwe mubibonamo ikibazo mwatubwira icyo twakabaye dukora.”

Gusa nubwo iyi minisiteri itangaza ibi, kugeza ubu mu karere ka Nyagatare hari inzu zimwe na zimwe kugeza ubu ba nyirazo bafunze imiryango, bakavuga ko bagiye gushaka imibereho mu gihugu cya Uganda kubera ko bugarijwe n’icyo bita inzara.

Mu karere ka Kayonza cyane mu murenge wa Rwinkwavu ho mu kwezi gushize habarurwaga abantu 30 bamaze guhunga ingo zabo bajya ahandi harimo no mu bihugu bihana imbibi n’u Rwanda gushaka amaramuko kugira ngo barebe ko baba baruhutse inzara bahaye izina rya Nzaramba.

Muneza Ferdinand

Makuruki.rw

Yisangize Inshuti.

Ibitekerezo 2

  1. Uyu mugore we numvise avugana ubwishongozi ni cyongera kidasobanutse!nawe bye bye!nturaye

Tanga Igitekerezo