RGB igiye gutangiza gahunda yo kunoza serivisi yise Nk’Uwikorera

Urwego rw’Igihugu rw’Imiyoborere (RGB) rugiye gutangiza gahunda yo kunoza imitangire ya serivisi yiswe “Nk’uwikorera” hibandwa cyane cyane kuri gahunda zigenerwa abaturage, bo shingiro ry’imiyoborere myiza.

Iyi gahunda yiswe “Nk’uwikorera” izabera mu gihugu cyose, ikazamara ibyumweru 10 n’ubwo Urwego rw’Igihugu rw’Imiyoborere ruvuga ko rutazahwema guharanira ko abanyarwanda babona serivisi zinoze.

Mu kiganiro n’abanyamakuru cyabaye kuri uyu wa 28 Werurwe 2017, Umuyobozi mukuru w’Urwego rw’imiyoborere, Prof Shyaka Anastase yasobanuye ko hari serivisi zitandukanye zigikemangwa n’abazigenerwa ari nayo mpamvu y’iyi gahunda mu rwego rwo kugabanya ahakigaragara icyuho.

Si ubwa mbere hatangijwe ubukangurambaga ku gutanga serivisi nziza ariko umwihariko w’iyi gahunda “Nk’Uwikorera” ni uko izibanda kuri gahunda zigenerwa abaturage cyane cyane izagenewe abatishoboye ariko ntizibagereho nk’uko bikwiye.

Yagize ati “ Iyi gahunda ntabwo ije inegetse, ije kugereka ibuye ku rindi kuri gahunda zabanje, ariko umwihariko wayo twe turareba umuturage cyane, ari ukeneye serivisi z’ubuhinzi n’ubworozi, ari wa muturage w’umukene leta y’u Rwanda yifuza kuzamura, akagenerwa porogaramu ariko ntizimugereho neza. Niba ari Girinka, turifuza ko imugeraho kandi ari we uyigenewe , niba ari ugenewe inguzanyo ya VUP nabe ari we uyigenerwa.”

Prof Shyaka Anastase yongeyeho ko iyi gahunda idashingiye ku kwakira abakeneye serivisi gusa, ahubwo ko ishingiye ku gushyira mu bikorwa ibyo abakeneye serivisi bakeneye.

Yagize ati "Ushobora kwakira umuturage ariko ntumuhe icyo umugomba, cyangwa ukamusekera ukamubwira uti uzagaruke ejo twongere tubirebe. Turagira ngo twumve ko imitangire ya serivisi itarangirira mu kwakira gusa, irakomeza ikagera mu mikorere.”

Muri ibi byumweru icumi, RGB ivuga ko aho bazajya basanga ikibazo cya serivisi zitanoze, bazajya basiga abaturage bazihawe.

Zimwe muri serivisi zizarebwa harimo gahunda zagenewe abatishoboye nka VUP na Girinka,isuku n’isukura, imikorere y’amakoperative, abikorera n’amahoteli, bikazatangirizwa mu Karere ka Karongi kuwa 30 Werurwe 2017.

Urwego rwa Serivisi rwinjiza 48% by’umusaruro mbumbe wa leta, ariko ruracyagaragaramo imikorere mibi.

Muri gahunda y’imbaturabukungu ya 2 (EDPRS2) izarangira mu mwaka utaha wa 2018 biteganijwe ko abaturage bazaba bishimira serivisi ku kigero cya 85%, mu gihe kuri ubu kiri ku kigero cya 72.93%.

Imitangire ya Serivisi ni kimwe mu byakunzwe kugarukwaho haba muri nama y’Umushyikirano 2017, Umwiherero w’abayobozi bakuru b’igihugu ndetse no mu ijambo ritangira umwaka wa 2017 rya perezida Kagame, bikaba bigaragaza ingufu zashyizwe mu kuzamura ireme rya serivisi.

Yisangize Inshuti.

Ibitekerezo

Tanga Igitekerezo