Abamotari bo mu mujyi wa Kigali barinubira guhora bacuruzwa nta nyungu

3

Aba bakora umwuga wo gutwara abagenzi kuri moto bakorera mu mujyi wa Kigali, baravuga ko bakomeje gukorera mu gihombo bita ko giterwa n’impuzamashyirahamwe yabo (FERWACOTAM), ahanini bitewe n’uburyo ngo birirwa bambaye amajire yamamaza amasosiyete anyuranye ariko bo bakaviramo aho kuko amafaranga aza yigira muri iryo shyirahamwe kandi bagakwiriye kugabana kuburyo buri ruhande rugira icyo rubona.

Ni kenshi aba bakora uyu mwuga bakunze kumvikana mu itangazamakuru batunga agatoki ubuyobozi bw’amashyirahamwe babarizwamo, aho babashinja kubahohotera, gufata imyanzuro batumvikanyeho, kubarira amafaranga n’ibindi bitandukanye. Aha ariko ubuyobozi bw’ayo makoperative bwo buvuga ko ibyo bukora biba biri mu nyungu rusange z’ayo makoperative, ko ahubwo ari ikibazo cy’imyumvire y’aba bamotari.

Mu gihe gishize aba bamotari bategetswe kujya bambara umwenda ubaranga ( Jire), mu rwego rwo guca akajagari hagamijwe gushyiraho imikorere inogeye buri wese.

Bidatinze, uyu mwambaro w’aba bamotari ku bwumvikane bwa sosiyete ya TIGO n’impuzamashyirahamwe babarizwamo ngo wahise ushyirwaho ibirango by’iyo sosiyeti y’itumanaho ya ndetse ngo banategekwa kujya bawambara hagamijwe kuyamamaza gusa bavuga ko bitabashimishije kuko ari icyemezo cyabaguye hejuru batakimenyeshejwe.

Umwe mu bamotari waganiriye na Makuruki.rw, avuga ko bitumvikana uburyo birirwa bambaye imyenda yamamaza TIGO kandi bo ntibagire inyungu babibonamo.

Yagize ati:” Ibibera rwose muri uyu mwuga wacu ni agahomamunwa. Ntibyumvikana uburyo badushyiraho itegeko ryo kwirirwa twamamaza abandi kandi nta nyungu tubifitemo. Twakagombye kugira icyo tubonaho kuko ni ubucuruzi nk’ubundi. Gusa birababaje kwirirwa ducuruzwa, tugatunga abandi twe tubayeho nabi.”

Undi nawe yunze mu rya mugenzi we, avuga ko bitumvikana uburyo banategekwa kwishyura ayo majire yagize ati:”Ibiba mu Rwanda rwose birasekeje. Ni gute umuntu umwamamaza warangiza ukanamwishyura? Nzaba ndeba aho uru Rwanda rugana mu gihe hakiri abantu bameze gutya.”

Aba bamotari kandi bavuga ko ubu noneho TIGO yamaze gutandukana n’impuzamashyirahamwe yabo, maze ngo bagahita bahabwa itegeko ryo kwambara imyenda ibaranga yamamaza sosiyite ya Airtel, ibintu nabyo bavuga ko batazi aho byaturutse.

Umwe muri bo yagize ati:” Rwose ntababeshye, uwuhinga aho atazasarura arasiba. Niyo mpamvu mubona motari iki kijire aho kucyambara akizirika mu mahembe ya moto kuko nta nyungu afite mu kucyambara. Nibaduhe amahoro rwose birakabije kuko igihe tugezemo nta muntu wakabaye agikora ngo abandi barye we yicwa n’inzara.”

Ibyo aba bamotari bavuga ku rundi ruhande binemezwa n’ubuyobozi bw’iyi mpuzamashyirahamwe, aho umuyobozi wayo Ntaganzwa Celestin avuga ko bakorana n’ayo masosiyeti y’itumanaho, ko ariko amafaranga babona akoreshwa ku bw’inyungu rusange z’impuzamashyirahamwe yabo.

Yagize ati:” Nibyo koko ayo mafaranga araza ariko ntabwo buri wese yagira icyo abonaho kuko aba ari macye, ahubwo tuyakoresha ku nyungu zacu twese, kuko nkubu turateganya kubaka inzu tuzakoreramo n’ibindi urumva rero ko ari inyungu zacu twese.”

Uyu muyobozi avuga ko mu rwego rwo korohereza aba bamotari ngo ijire bagiye kujya bayihabwa ku buntu, ibintu bitandukanye n’ibyari bisanzwe bitewe n’uko bajyaga bayigura, ari naho baheraga bavuga ko bamamaza bakongera bagasabwa no kwishyura.

Ubuyobozi bwa FERWACOTAM bukomeza busaba aba banyamuryango babo guhindura imyumvire, bakumva ko nta buriganya buba mu micungire y’umutungo wabo nkuko babyibwira ahubwo bakegera abayobozi babo bagasobanuza ibibazo batumva aho kugendera mu kigare gusa.

Ku ruhande rw’aba bamotari bo bavuga ko byakabaye byiza bahawe amajire adafite umuntu yamamaza cyangwa se bagahabwa ayanditseho umujyi wa Kigali bakoreramo, mu rwego rwo koroshya iki kibazo.

Muneza Ferdinand

Makuruki.rw

Yisangize Inshuti.

Ibitekerezo 3

  1. Murakoze ; Ukombyumva Abamotari Bakwiriye Gucisha Macye Noneho
    Abayobozi Bagakuricyirana Icyo Cyibazo Vuba Kuburyo Bunogeye Imande Zombi; None Kubijyanye Namajiri; Bahindure; Bandikeho Ijambo Rijyanye Numwuga Bakora Hamwe Naho bakorera

    Icyindi Kwamamariza Itumanaho Bigomba Gutorerwa AbandiBantu
    Babibashije Bikaba AKazi Kabo Baga Hembwa; Kandi Neza Twese Tugatera Imbere Neza Nawubangamiye undi/ MUrakoze Imana ibahe Umugisha ( Amena )

  2. Murakoze ; Ukomva Abamotari Bakwiriye Gucisha Macye Noneho
    Abayobozi Bagakuricyirana Icyo Cyibazo Vuba Kuburyo Bunogeye Imande Zombi; None Kubijyanye Namajiri; Bahindure; Bandikeho Ijambo Rijyanye Numwuga Bakora Hamwe Naho bakorera

    Icyindi Kwamamariza Itumanaho Bigomba Gutorerwa Abani Bantu
    Babibashije Bikaba AKazi Kabo Baga Hembwa; Kandi Neza Twese Tugatera Imbere Neza Nawubangamiye undi/ MUrakoze Imana ibahe Umugisha ( Amena )

  3. iyo abayobozi bashaka kurya abaturage baravuga ngo "imyumvire" muge mwongeraho "mibi" kugira ngo mubaheze neza

Tanga Igitekerezo