Musanze: Barinubira guhora bazerera kandi bafite impano zipfa ubusa

Bamwe mu banyamwuga n’abanyabukorikori bo mu karere ka Musanze, baravuga ko kuba nta gakiriro bafite kabafasha kwihangira imirimo, ngo biri mu bibasubiza inyuma ndetse bikaza no ku isonga ry’abirirwa bazerera kandi ngo hari imyuga bazi bakabyaje umusaruro.

Gahunda yo kubaka udukiriro mu Rwanda, ni gahunda yatekerejwe hagamijwe kuzamura imibereho y’abanyarwanda ndetse no guhangana n’ikibazo cy’ubushomeri ndetse n’ubuzererezi by’umwihariko mu rubyiruko.

Abanyabukorikori batandukanye mu karere ka Musanze bo bavuga ko kuba nta gakiriro bafite mu karere kabo ngo biri gutuma ikibazo cy’ubushomeri ndetse n’ubuzererezi mu rubyiruko gikomeza kurushaho kwiyongera.

Aba basore n’inkumi baremeza ko bafite imyuga itandukanye bazi, ariko ngo bakazitirwa no kubura aho bayibyariza umusaruro.

Burindwi Janvier, umwe mu bagize urubyiruko avuga ko azi gusudira ariko akaba yarabuze ahantu hisanzuye yakorera uyu mwuga we.

Yagize ati: ”Leta idushishikariza kwihangira imirimo, ariko twe hano i Musanze twabuze aho duhangira imirimo yacu. None se ubu wansobanurira gute impamvu hano tutagira agakiriro nkuko mu tundi turere bimeze?”

Ibivugwa n’uru rubyiruko, ku rundi ruhande byemezwa n’abanyamuryango b’Impuzamakoperative Duhaguruke/ Kora yo ifite ahayo ikorera, abayikoreramo bavuga ko haramutse hubatswe agakiriro kagutse byagira uruhare mu guhanga imirimo, kuko naho bakorera ubwabo ngo ni hato cyane kandi hakaba mu mujyi rwagati, ibintu ku rundi ruhande ngo bitanga isura itari nziza ku karere kabo.

Ku ruhande rw’akarere ka Musanze, umuyobozi wako wungirije ushinzwe imari n’iterambere, HABYARIMANA Jean Damascène yatubwiye ko iki kibazo ubu batangiye kugishakira igisubizo kuburyo ngo mu mu minsi ya vuba kizaba cyakemutse babonye agakiriro ko gukoreramo.

Yagize ati : «Ubu tuvugana inyigo tuyigeze kure, aho kazubakwa naho harabonetse ni mu Ruhunga, mu Murenge wa Kimonyi n’ubundi ahuzubakwa inganda, kandi turabona bimeze neza nibahumure bizakemuka vuba.»

Uyu muyobozi akomeza avuga ko aba banyabukorikori nabo bagomba kugira uruhare mwiyubakwa ryako, bafatanije na Leta

Kugeza ubu umujyi wa Musanze byamaze kwemezwa ko ugomba kuba umujyi wa kabiri Nyuma ya Kigali.

Gusa umuyobozi w’intara y’Amajyaruguru Bosenibamwe Aimé we avuga ko uyu mujyi wa Musanze uzatera imbere ari uko ibyo bibazo byose bimaze gukemuka.

Muneza Ferdinand

MAKURUKI.RW

Yisangize Inshuti.

Ibitekerezo

Tanga Igitekerezo