Abatwara abagenzi mu ruhuri rw’ibibazo byatumye batabaza Leta

1

Bamwe mu bakora akazi ko gutwara abagenzi mu modoka, barasaba inzego zishinzwe abakozi ndetse n’umurimo mu Rwanda kubakorera ubuvugizi bagahabwa ibyangombwa byose bigenerwa umukozi, birimo amasezerano y’akazi, ubwishingizi ndetse n’ibindi bitandukanye.

Aba bashoferi baganiriye na Makuruki.rw bakorera mu ma kompanyi atandukanye atwara abagenzi mu mujyi wa Kigali, baravuga ko bakorerwa icyo bita ihohoterwa mu kazi kabo ka buri munsi, harimo kuba ngo nta masezerano y’akazi bagira, kudahabwa ubwishingizi, gukora amasaha y’ikirenga kandi ngo ntibayahemberwe, kwirukanwa mu buryo budasobanutse n’ibindi, bakifuza ko na bo bagira uburenganzira nku bw’abandi bakozi hakurikijwe uko itegeko rigenga umurimo mu Rwanda ribiteganya.

Umwe muri bo yagize ati:” Nk’ubu urabona dutangira akazi saa kumi n’ebyiri tugataha saa yine hafi saa tanu (z’ijoro), ubundi itegeko rigenga umurimo rivuga ko umukozi agomba gukora amasaha 8 arenzeho akayahemberwa, ibyo ntibiba hano, nta bwishingizi tugira, nta bwiteganyirize, ubwo se urumva ibi koko hari icyo byatugezaho? Bikwiriye gusobanuka.”

Aba bashoferi bavuga ko iki kibazo bakunze kukigaragaza, ariko abakoresha babo bakababwira ngo nibihangane none imyaka ngo ikaba ibaye myinshi, bakifuza ko na bo bafatwa nk’abandi bakozi basanzwe.

Ku rundi ruhande, aba bashoferi bagaragaza impungenge z’uko nta terambere bashobora kugeraho mu ngo zabo bitewe n’uko badashobora kubona inguzanyo muri banki byibuze ngo barebe uko bakwiteza imbere mu gihe badafite amasezerano y’akazi.

Bati:” Murabizi ko muri iki gihe nta muntu watera imbere atisunze banki, ubu se ni gute najya gusaba inguzanyo nta kontaro ngira? Ubu se mu gihe tuzagera mu za bukuru tutagishoboye gukora bizagenda gute? Abandi bageze muri icyo gihe se ntuzi ko batungwa na pansiyo (Pension) zabo ? ibi birakabije pe! "

Uretse ibyo byose bagarutseho, haniyongeraho ko ushatse kugira icyo abaza kigendanye n’uburenganzira bwe ngo ahita yirukanwa, bityo ngo ugasanga bahorana ubwoba bwo kwibombarika ngo badatakaza akazi kabo.

Ku ruhande rw’abayoboye ama kompanyi akoresha aba bashoferi, birinze kugira icyo bavuga kuri iki kibazo mu buryo bweruye, ariko bose bahuriza ku kuba ngo bazabikora bitewe n’uko babiganiriye n’aba bakozi, gusa aba bakozi bo bavuga ko kuvuga ko bazabikora ngo byabaye nk’inyikirizo y’indirimbo.

Nkusi Mukubu Gerard ushinzwe ubuvugizi mu rugaga nyarwanda rw’abikorera ku giti cyabo (PSF Rwanda), avuga ko iki kibazo batari bakizi, gusa ngo niba gihari koko byaba ari ikibazo gikwiye gukemuka.

Yagize ati:" Ntabwo twari tucyizi ariko nibaze batubwire uko bimeze twabafasha, tukabereka aho banyura kandi bigakemuka."

Iki kibazo kandi kigeze gukomozwaho n’Umunyamabanga wa Leta ushinzwe ubwikorezi rusange, Dr Alexis Nzahabwanimana, nawe wavuze kuba aba bashoferi badafite ibyo bemererwa n’amategeko ari ikibazo gikomeye, byatumye abakangurira guharanira uburenganzira bwabo nkuko biteganywa mu itegeko rigenga umurimo mu Rwanda.

Muneza Ferdinand

Makuruki.rw

Yisangize Inshuti.

Ibitekerezo 1

  1. Ahaa ubuse ko nakoze muri international imyaka ibiri! sinagiye muri caisse social ngasanga ntanigiceri banshyiriyeho kandi barayakataga buri kwezi! Twarenganye cyera, nagiye kubaza kuri office bakandimanganya ngo bazayashyiraho! nanubu nta nurutoboye bigeze bashyiraho.

Tanga Igitekerezo