Minisitiri w’intebe na Perezida w’urukiko rw’ikirenga bizeye amahoro mu matora

Perezida w’urukiko rw’ikirenga Prof Sam Rugege na Minisitiri w’intebe Murekezi Anastase batoreye mu murenge wa Remera bose bagaragaza ko bizeye ko amatora agomba kuba mu mahoro.

Prof Sam Rugege yatoreye kuri Greenhills Nyarutarama mu gihe Minsitiri w’intebe we yatoreye kuri Petit Stade i Remera, hose ni mu Murenge wa Remera.

Akimara gutora, Minisitiri w’intebe Anasthase Murekezi mu magambo macye abwiye itangazamakuru avuze ko aya matora ari amatora y’amahoro.

Ati :”Aya ni amatora meza, amatora yo mu mahoro, ubu abanyarwanda twihitiyemo uko tuzabaho mu myaka 7 iri imbere.”

Naho Prof Sam Rugege umuyobozi w’urukiko rw’ikirenga we amaze gutora avuze ko abanyarwanda bagomba kwihitiramo ababayobora kandi bagafatanya mu byiza babagezaho.

Ati :”Amatora agomba kuba muri demokarasi abanyarwanda bakihitaramo ubayobora kandi abanyarwanda bamaze gusobanukirwa ko bagomba gufatanya n’abayobozi mu byiza babagezeho. Amatora agomba kuba neza nta ntugunda kandi abanyarwanda barabizi amateka yacu yadusigiye isomo.”

Murekezi mu gihe abakandida biyamamazaga yavuze ko ashyigikiye umukandida wa FPR Inkitanyi, Paul Kagame, akaba yaranamwamamaje mu turere twinshi aho yagiye.

Aya matora ahanganishije abakandida batatu bose bashaka kuba abakuru b’igihugu bari mo Paul Kagame usanzwe ayobora u Rwanda , Dr Frank Habineza watanzwe na DGPR ndetse na Mpayimana Philippe.


Prof Sam Rugege yatoreye Nyarutarama kuri Green Hills


Minisitiri w’intebe Murekezi Anasthase yatoreye I Remera kuri petit Stade

Yisangize Inshuti.

Ibitekerezo

Tanga Igitekerezo