[AMAFOTO]: Car free day mu ishusho yo kwishimira intsinzi y’amatora ya Perezida

Siporo rusange ku banya-Kigali yatangiwemo ubutumwa bwo kwishimira umusaruro w’ibyavuye mu matora yabanjirijwe n’ibikorwa byo kwamamaza umukandida wayatsinze bikitabirwa n’abanya-Kigali b’ingeri zose kandi ku bwinshi.

Kuri iki cyumweru tariki 06 Kanama, wari umunsi wa siporo rusange ku banya-Kigali aho imihanda imwe n’imwe iba yafunzwe ku binyabiziga ahubwo igakoreshwa n’abanyonzi ndetse n’abanyamaguru bari muri siporo rusange.Iyi siporo imaze kumenyerwa ko iba ku cyumweru cya mbere cya buri kwezi.

Kuri uyu munsi na bwo abaturage bamwe baturutse impande zitandukanye bahurira kuri Stade Amahoro abandi bahurira muri Car free zone mu mujyi rwagati,ndetse hari n’abahuriye kuri Ninzi Hill Hotel bakora siporo yo kwiruka ku maguru no kunyonga amagare maze nyuma bahurira muri parikingi ya Rwanda Revenue Authority bakora imyitozo ngorora mubiri mu buryo bwa rusange.

Mu butumwa bwatanzwe mbere na nyuma y’iyi siporo. Visi Meya ushinzwe imibereho myiza y’abaturage mu mujyi wa Kigali ,Muhongerwa Patricie, yavuze ko kuba iyi siporo ibaye nyuma y’amatora abantu bakwiye kuyikora mu rwego rwo kwishimira intsinzi y’amatora ya Perezida wa Repubulika yabaye tariki 03 na 04 Kanama uyu mwaka.

Muhongerwa yavuze ko Imana ari yo yarinze Paul Kagame ndetse n’abanyarwanda bose, avuga ko no muri iyi siporo rusange ari igihe cyo kwizihiza intsinzi y’amatora.

Yagize ati: " Imana yaramurinze (Kagame) kandi natwe yaraturinze, Ubu rero tugiye gutangira siporo mu minota mikeya, ugende ariko no mu mutima wawe wishima, wizihiwe, unejejwe n’igikorwa wakoze, turimo turizihiza intsinzi, ndakeka ko mwese buri muntu yagize amahirwe yo kugira aho ahurira n’abandi ku itariki ya 04 nimugoroba kunezerwa no kwizihiza intsinzi, ubu rero tugiye kubikora mu yindi shusho na yo iryoheye umujyi, dushyushya umujyi ariko tunakora siporo, tunakora neza imibiri yacu kugirango turambe, tugire ubuzima burambye."

Meya w’Umujyi wa Kigali, Nyamulinda Pascal na we mu butumwa bwe yagarutse ku matora ya Perezida aho yashimiye abantu bose bifatanyije n’umujyi wa Kigali mu rugendo rwo kwamamaza umukandida Paul Kagame rwasorejwe i Bumbogo aho Paul Kagame yasoreje ibikorwa bye byo kwiyamamariza umwanya w’umukuru w’igihugu.

Yagize ati: "Ndagirango mbanze nshimire abantu bose twakoranye urugendo rwo kujya i Bumbogo, hano mugombe kuba murimo muri benshi, twakoranye urugendo rwo kujya Bumbogo, urugendo twakoze kugirango dushyigikire tunamamaze umukandida wacu, hanyuma byose byagenze neza!"

....Tujya Bumbogo twagiye n’amaguru, turagenda tugerayo, urubyiruko n’abandi bose mwarabyitabiriye, twagezeyo tujya gukora igikorwa twagombaga gukora cyo kwamamaza umukandida w’abanyarwanda, icyo gihe byagenze neza!

Iyi ntsinzi aba bayobozi bagarutseho bashingiye kubyo Komisiyo y’Igihugu y’Amatora yatangaje by’agateganyo ivuga ko Paul Kagame, umukandida w’Umuryango FPR-Inkotanyi ari we waje imbere y’abo bahataniraga umwanya w’umukuru w’igihugu n’amajwi 98.63 %, Mpayimana Phillipe wamukurikiye yari umukandida wigenga afite 0.73 % mu gihe Frank Habineza w’ishyaka Democratic Green Party of Rwanda we yagize 0.47 %.

Muri iyi siporo rusange, abantu banagira amahirwe yo kwisuzumisha zimwe mu ndwara zitandura nk’umuvuduko w’amaraso, umubyibuho ukabije na diyabete.


Visi Meya w’umujyi ushinzwe imibereho myiza, Muhongerwa Patrice yizihiwe na siporo rusange ya nyuma y’amatora


Meya w’umujyi wa Kigali, Nyamulinda Pascal, na we yishimiye iyi siporo yagereranyijwe no kwizihirwa n’intsinzi y’amatora


Abanya-Kigali bamaze kumenyera siporo rusange ya buri kwezi.


Hari abahawe ibihembo kubera kugaragaza ubwitange mu gufasha abandi mu gikorwa cya siporo rusange.


Abaganga bari bahari ngo bapime abanyarwanda indwara zitandura bahabwe inama zijyanye n’ibizubizo byabo.

Inkuru: Niyitanga Jean Paul
Amafoto: Karangwa Gaspard

Yisangize Inshuti.

Ibitekerezo

Tanga Igitekerezo