Umwana wakiriwe na Perezida Kagame yamusezeyeho agira n’icyo amusezeranya

Nyuma y’imyaka ibiri yemerewe ubutumire na Perezida Paul Kagame nyuma akaza gukabya inzozi ze Wendy Waeni mbere y’uko asubira mu gihugu cye yashimiye Perezida Kagame uburyo yamwakiriye ndetse amusezeranya ko azagaruka.

Kuri uyu wa 11 Nzeli 2016 nibwo Wendy Waeni umwana w’umukobwa ukomoka mu gihugu cya Kenya akaba azwiho impano idasanzwe mu mikino ngororamubiri yasubiye mu gihugu cye nyuma yo kwakirwa na Perezida Paul Kagame.

Wendy Waeni abinyujije ku rukuta rwe rwa Twitter yasezeye kuri Perezida Paul Kagame ndetse amushimira uburyo yamwakiriye anamusezeranya ko azagaruka vuba.

Yagize ati; ‘ Uramuke Perezida,urakoze Perezida Paul Kagame kunyakira. Nzagaruka bidatinze.”

Soma hano inkuru bijyanye:http://makuruki.rw/POLITIKE-Y-U-RWANDA/article/Umwana-w-imyaka-10-yagaragaje-amarangamutima-yatewe-n-ubutumire-bwa-Perezida-Kagame

Uyu mwana tariki 12 Ukuboza 2014, nibwo yarimo asusurutsa abitabiriye ibirori by’umunsi w’Ubwigenge bwa Kenya “Jamhuri Day”, byahereye muri Nyayo Stadium bigakomereza mu Ngoro y’Umukuru w’Igihugu.

Aha ni ho Wendy Waeni umwana w’umukobwa w’imyaka 11 yabashije kuganira na Perezida Uhuru Kenyatta wari kumwe na Madamu we, ndetse n’abandi bakuru b’ibihugu barimo na Perezida Kagame.

Nyuma nibwo yaje gutangariza ikinyamakuru Tuko.co.ke ko mu byo akuye mu kuganira na Perezida Kagame ari uko amwemereye kuzamutumira i Kigali.
Tariki 8 Kanama 2016, Wend Waeni abicishije ku rubuga nkoranyambaga rwe rwa Twitter, yongeye kwibutsa Perezida Kagame ubutumire yamwemereye agira ati “Ndacyategereje ubutumire bwanjye mu Rwanda nk’uko mwabinsezeranyije Nyakubahwa.”

Perezida Kagame yahise asubiza amwizeza kumugezaho ubutumire mu gihe cya vuba, ati “Ndimo kubitunganya, ubutumire buzoherezwa vuba. Wagize neza gukomeza kubikurikirana.”

Ubwo yiteguraga guhaguruka yerekeza i Kigali, mu ijoro ry’itariki ya 8 Nzeri 2016, Wendy Waeni yagize ati "Nari ntegereje uyu munsi mu gihe cy’imyaka ibiri, none birashyize birabaye, ntangiye uruzinduko rwo gusura u Rwanda uyu munsi, ngo nakirwe na Perezida Paul Kagame.”

Kuwa 9 Nzeri 2016, ni bwo Wendy Waeni umwana w’umukobwa umaze kumenyekana kubera impano afite mu mikino ngororamubiri, yakiriwe n’Umukuru w’igihugu cy’u Rwanda, Paul Kagame, gusa nta cyatangajwe mu byo baganiriye.

Wendy Waeni abicishije ku mbuga nkoranyambaga zitandukanye yagiye agaragaza ko yishimiye bikomeye uburyo yafashwe neza mu ndege yari yishyuriwe na Perezida Kagame, ndetse n’uburyo yakiriwe i Kigali.

Wendy Waeni ni umuhanga mu ishuli ndetse binagaragarira mu bisubizo asubiza abamubajije haba mu biganiro bitandukanaye agirana n’itangazamakuru.

Wendy Waeni yagiye ashimisha abantu b’ingeri nyinshi baniganjemo abanyacyubahiro batandukanye barimo n’abaperezida b’ibihugu nka Perezida Uhuru Kenyatta wa Kenya, Perezida Kagame Paul w’u Rwanda, Perezida Yoweri Museveni wa Uganda, Perezida Mahama wa Ghana, Jacob Zuma wa Afurika y’Epfo na David Cameron wari Minisitiri w’Intebe w’u Bwongereza.

Uyu mukobwa kandi yazengurutse Aziya n’u Burayi yerekana impano ye, ahagararira Kenya mu imurika mpuzamahanga ry’impano, World Talent Expo, mu bihugu nka Taiwan n’u Bushinwa.

Uyu mwana w’umukobwa avuga ko akunda gukoresha impano ye, akagira inzozi zo kuzaba umupilote w’indege, agasaba guverinoma za Afurika guteza imbere abafite impano nk’iye, nk’umurimo ushobora gufasha benshi mu bakiri bato.

Wendy Waeni aganira na Perezida Kagame

Perezida Kagame yamuhaye impano


Ifoto igaragaza Wendy Waeni ari mu mikino ngororamubiri

Yisangize Inshuti.

Ibitekerezo

Tanga Igitekerezo