Umwami wa Maroc yasezeye kuri Perezida Kagame yerekeza muri Tanzaniya

1

Perezida Kagame yasezeye ku Mwami wa Maroc Mohammed VI wahagurutse mu Rwanda kuri uyu wa 23 Ukwakira 2016 aho yari amaze iminsi itandatu yerekeza muri Tanzaniya mu ruzinduko rw’akazi rw’iminsi itatu.

Mu ruzinduko Umwami Mohammed VI yagiriye mu Rwanda kuva ku wa 18 Ukwakira 2016, rwaranzwe n’ibiganiro byamuhuje na Perezida Kagame byose byerekeye kunoza umubano w’ibihugu byombi no kuzamurana mu rwego rw’ubukungu n’iterambere.

Ni muri urwo rwego hagiye yasinywa amasezerano ku mpande zombi agamije kuzamura iterambere no koroshya imigenderanire.

Kuwa Gatatu tariki 19 Ukwakira, abakuru b’ibihugu basinyanye amasezerano 19 mu bijyanye n’imikoranire mu ishoramari mu ma Banki ndetse no koroshya urujya n’uruza rw’abaturage ku mpande zombi.

Kuwa Kane tariki 20 Ukwakira 2016 ku mpande zombi hasinywe amasezerano y’ubufatanye mu by’ubuhinzi.

Kuwa gatanu, tariki 21 Ukwakira 2016 hasinywa amasezerano hagati y’Umuryango Imbuto Foundation n’Umuryango w’Umwami Mohammed VI ugamije iterambere rirambye, azareba iterambere ry’inzego z’ ubuzima, uburezi, ubukungu n’iterambere ry’urubyiruko n’abagore.

Hari kandi n’indi mishinga impande zombi zemeranyijweho harimo umushinga w’ubufatanye hagati ya Banki itsura amajyambere y’u Rwanda (BRD) na Sosiyete yitwa Palmeraie Development Group yo muri Maroc mu kubaka inzu 5000 ziciriritse zo guturamo.

Umwami wa Maroc yagiye atemberezwa mu bice bitandukanye by’u Rwanda ndetse anajyanwa mu bice ndangamateka nko ku rwibutso rwa Jenoside yakorewe Abatutsi rwa Kigali ruri ku Gisozi aho yasobanuriwe byinshi ku mateka ya Jenoside yakorewe Abatutsi mu Rwanda mu 1994.

Muri Tanzaniya, uyu Mwami ategerezanyijwe amatsiko aho byitezwe ko ari bugereyo aherekejwe n’abantu basaga 150 bo muri Maroc akaza kwakirwa na Perezida John Pombe Magufuli wa Tanzaniya.

Byitezwe ko uruzinduko rw’umwami wa Marc muri Tanzaniya ruzaba umwanya mwiza wo kuganira ku kunoza umubano, ubufatanye no gufungura amahirwe y’ishoramari ku mpande zombi.

Minisitiri w’ububanyi n’amahanga, Ubutwererane na Afurika y’Uburasirazuba, muri Tanzaniya Dr Augustine Mahiga yatangaje ko muri uru ruzinduko rw’umwami Muhammed VI hazasinywa amaserano asaga 18 hagati y’inzego zitandukanye ku mpande zombi akazasinyirwa imbere y’umwami wa Maroc na Perezida Magufuli.

Umwami wa Maroc kandi azanagirana ibiganiro na Perezida wa Zanzibar Ali Mohamed Shein muri iyi minsi itatu azamara muri Tanzaniya.

Yisangize Inshuti.

Ibitekerezo 1

Tanga Igitekerezo