Umufasha wa Perezida wa Benin yunamiye inzirakarengane za Jenoside yakorewe Abatutsi

Umufasha wa Perezida wa Benin, Madamu Claudine Gbènagnon Talon kuri uyu wa Kabiri yasuye urwibutso rwa Jenoside yakorewe Abatutsi ku Gisozi, yunamira inzirakarengane zisaga ibihumbi 250 zihashyinguye.

Madamu Talon uri mu ruzinduko rw’iminsi ine mu Rwanda, yari kumwe na Minisitiri w’Umuco na Siporo Uwacu Julienne ndetse n’umuyobozi w’urwibutso rwa Gisozi, Honore Gatera.

Yasobanuriwe amateka y’ubukoloni, uko bwabibye urwango mu banyarwanda, rugahemberwa kugeza kuri Jenoside yakorewe Abatutsi muri Mata 1994.

Yanasobanuriwe uko igihugu kiyubatse kivuye muri ayo mateka mabi, haba mu bumwe n’ubwiyunge ndetse no mu iterambere.

Nyuma yo gutemberezwa ibice bigize urwibutso no gusobanurirwa amateka ya Jenoside, yanditse mu gitabo cy’abashyitsi amagambo agira ati "Muzaguma mu mitima yacu, muzatubamo nk’ingufu zidutera kubana mu mahoro no mu bwumvikane."

Honore Gatera yashimye uruzinduko rwa Madamu Talon ndetse avuga ko bisobanuye byinshi ku barokotse Jenoside kuba abayobozi bakomeye kuri uyu mugabane baza gusura urwibutso rwa Jenoside yakorewe Abatutsi.

Yisangize Inshuti.

Ibitekerezo

Tanga Igitekerezo