Umudepite w’u Burundi muri EALA yaburiye abahakana Jenoside yakorewe Abatutsi

Hon Martin Nduwimana uhagarariye u Burundi muri EALA

Umudepite uhagarariye u Burundi mu Nteko Ishinga Amategeko y’Umuryango wa Afurika y’Iburasirazuba (EALA) yatangaje ko nyuma yo kwigerera mu Rwanda akirebera ibimenyetso by’amateka ya Jenoside yakorewe Abatutsi yamaganye abagerageza kuyipfobya no kuyihakana aho baba baturuka hose.

EALA yatoranyije itsinda ry’abadepite 9 barimo kuzenguruka mu bihugu bigize umuryango wa Afurika y’iburasirazuba (EAC) mu rwego rwo kwiga ku buryo bwo kurwanya ingengabitekerezo ya Jenoside no guhangana n’abayihakana.

Iri tsinda ry’abadepite barimo na Martin Nduwimana uhagarariye u Burundi muri EALA
barakora iki gikorwa mu gihe mu minsi ishize uwahoze ari umuyobozi w’ishya CNDD FDD riri ku butegetsi mu Burundi Pascal Nyabenda aherutse guhakana Jenoside yakorewe abatutsi ku mugaragaro.

Icyo gihe Pascal Nyabenda yanditse avuga ko Jenoside yakorewe Abatutsi ari amakabyankuru n’amayeri yakozwe, ngo hahirikwe Leta yari iyobowe n’Abahutu mu mwaka wa 1994. Ibi byanenzwe cyane n’umuryango w’abibimbye.

Hon Martin Nduwimana yavuze ko nubwo hakiriho abantu mu karere bagihakana Jenoside yakorewe Abatutsi, ngo we ntiyemeranya na bo kuko ngo na mbere yo kuza mu Rwanda yari azi neza ko habaye Jenoside yakorewe Abatutsi.

Yagize ati: "Twe ntitwaje kureba niba Jenoside yarabaye, Jenoside yarabaye n’Isi yose irabizi ko yahabaye, twaje kureba uko yagenze, impamvu yabaye, ababiteguye babiteguye gute, ababikoze babikoze gute, kugirango tubone isomo ry’uburyo umuntu yabirwanya bitaraba. Guhakana ko Jenoside yabayeho hari amategeko mpuzamahanga abihana, abo baba barenze amategeko, kandi abayarenze na bo amategeko arabahana "

Agaruka kuri Nyabenda wahakanye Jenoside, yagize ati: "ibyo twarabyumvise ko hariho abantu babivuze, biri mu byo dushyira hamwe hanyuma tugakuramo umwanzuro cyangwa icyegeranyo [ ....] ibyo rero biravugwa haba mu Burundi, haba muri Tanzaniya, muri Kenya cyangwa hano (mu Rwanda) cyangwa muri Uganda, tuzi yuko hari abavuga ibintu bishobora kujyana mu nzira itariyo, igikuru ni uko abantu babimenya ku buryo nta handi bizongera kuba"

Yavuze ko abatuye mu karere ka Afurika y’iburasirazuba bakwiye guhagarara kigabo bakarwanya ingengabitekerezo ya Jenoside kugirango itazagira ahandi iba.

Ati:"...Niba byarabaye mu Rwanda n’ahandi bishobora kuhaba mu gihe abagize aka karere ka Afurika y’iburasirazuba badahagaze kigabo ngo bakore ibikenewe kugirango ihonyabwoko ryabaye hano mu Rwanda ribe irya nyuma...turabizi ko bishobora kuba n’ahandi kuko byabaye mu Rwanda bimaze kuba n’ahandi mu gihe abantu badakanuye bishobora kuba n’ahandi"

Hon Judith Pareno uhagarariye Kenya akaba ari na we uyoboye iri tsinda, yavuze ko icyo bagamije ari ukugirango bumve uko ingengabitekerezo ya Jenoside ihagaze mu karere kugirango bafate ingamba, bashyireho amategeko, n’uburyo bwo guhangana n’abahakana bakanapfobya Jenoside kimwe n’abafite ingengabitekerezo yayo.


Hon Judith Pareno uhagarariye Kenya muri EALA

Aba badepite bazamara icyumweru mu Rwanda, bakaba bamaze gusura inzibutso zishyinguyemo imibiri y’abazize Jenoside yakorewe Abatutsi ndetse banasuye aho ari ho hose babona ibimenyetso bya Jenoside ndetse banaganira na bamwe mu bayirokotse babaha ubuhamya.

Aba badepite muri rusange bashimye u Rwanda ko rwabashije gusigasira ibimenyetso bya Jenoside yakorewe abatutsi ndetse no kuba rwarabashije kwiyubaka nyuma yayo rukagera ku iterambere rishimishije rumaze kugeraho.

Yisangize Inshuti.

Ibitekerezo

Tanga Igitekerezo