Ubufaransa bwabonye umugaba mukuru w’Ingabo wabaye muri "Operation Turquoise" mu Rwanda

1

Kuri uyu wa Gatatu Perezida w’Ubufarana Emmanuel Macron yashyizeho Umugaba Mukuru w’ingabo mushya General François Lecointre wahoze ari umwe mu basirikare b’icyo gihugu bagize uruhare muri Operation Turquoise mu Rwanda.

Lecointre yahawe imirimo mishya asimbuye Gen Pierre Le Jolis de Villiers weguye kuri uyu wa Gatatu nyuma yo kutumvikana na Perezida Macron ku igabanywa ry’ingengo y’imari igenewe igisirikare.

Miliyoni 850 z’amayero nizo Macron yasabye ko zigabanywa ku ngengo y’imari y’igisirikare muri gahunda y’ibihugu bigize Umuryango w’Ubumwe bw’Uburayi yo gukoresha atarenze 3% by’umusaruro mbumbe w’igihugu.

Lecointre wasimbuye De Villiers yari asanzwe ashinzwe iby’umutekano mu biro bya Minisitiri w’Intebe.

Ni umwe mu basirikare bagize uruhare muri Zone Turquoise mu Rwanda mu mwaka wa 1994. Iyo Zone yabaye inzira yo guhungisha benshi mu bari bamaze gukora Jenoside yakorewe Abatutsi bagahungira muri Repubulika Iharanira Demokarasi ya Congo (yahoze ari Zaire).

Ubusanzwe inshingano z’iyo operation yemejwe na Loni, zari izo kurindirra umutekano abasivili, abavuye mu byabo n’impunzi n’ibikorwa by’ubutabazi aho biri ngombwa.

Ubufaransa ntiburemera uruhare rwabwo muri Jenoside yakorewe Abatutsi byanakunze kugira ingaruka ku mubano wabwo n’u Rwanda.

Uyu mugaba mushya w’ingabo z’Ubufaransa yanarwanye mu bihugu bitandukanye nka Bosnie-Herzégovine, Irak, Djibouti, Somaliya n’ahandi nkuko ikinyamakuru Le Monde cyabitangaje.

Afite akazi katoroshye ko gutegura bundi bushya ibikorwa by’ingabo z’Ubufaransa agendeye ku ngengo y’imari yashyizweho na Macron.

Yisangize Inshuti.

Ibitekerezo 1

  1. ariko abafaransa mwazaretse tugafatana nabo tukareba ushyira indi hasi aho kwirwa tubasakuriza

Tanga Igitekerezo