U Rwanda rwihanganishije Sierra Leone nyuma y’imyuzure yahitanye imbaga

1

Igihugu cya Sierra Leone cyahuye n’ibiza bikomeye byaturutse ku myuzure yatumye abantu basaga 312 bahaburira ubuzima. Umuvugizi wa Guverinoma akaba na Minisitiri w’ububanyi n’amahanga mu Rwanda Louise Mushikiwabo yihanganishije imiryango y’ababuriye ababa muri ibi biza.

Iyi myuzure yatumye umusozi uri ahitwa Regent hafi y’Umurwa mukuru Freetown uriduka mu gicuku cyo kuri uyu wa Mbere bitewe n’imvura nyinshi yahaguye. Iyi nkangu iri mubyahitanye abatari bake kuko umusozi waridukiye ku mazu y’abantu bagisinziriye abenshi bagapfa.

Kuba iyi mvura idasanzwe yaguye mu hige abantu benshi bari bagisinziriye bishobora kuza gutuma umubare w’abapfiriye muri iki kiza ukomeza kwiyongera kuko bishoboka ko hari abataramenyekana ko bahitanywe na cyo.

Minisitiri w’ububanyi n’amahanga akaba n’umuvugizi wa Guverinoma y’u Rwanda Louise Mushikiwabo akoresheje urukuta rwe rwa twitter yatangaje ko u Rwanda rwababajwe n’ibi biza kandi ko rwihanganisha ababuze ababo.

Minisitiri Mushikiwabo yagize ati: " “Urupfu rwakomotse ku nkangu muri Sierra Leone rwatubabaje hano mu Rwanda, turifuriza abavandimwe bacu babuze ababo gukomera no kwihangana.”

AFP yatangaje ko abantu 312 bamaze kumenyekana ko babuze ubuzima mu gihe abasaga 2000 badafite aho gukinga umusaya nyuma yuko inzu zabo zisenyaguwe n’inkangu n’imyuzure.

Inzego z’ubutabazi muri iki gihugu no ku rwego mpuzamahanga zirimo kugerageza gushakisha ngo zirebe ko zagira abo zirokora.


Imisozi n’amazu byatwawe n’imyuzure n’inkangu


Ubutabazi bukomeje gukorwa

Yisangize Inshuti.

Ibitekerezo 1

Tanga Igitekerezo