Ambasade y’u Rwanda yafunguwe ku mugaragaro muri Congo Brazzaville

Minisitiri Louise Mushikiwabo niwe wari uhagarariye u Rwanda muri uyu muhango

Kuri uyu wa Gatandatu tariki 20 Kanama 2016, muri Congo Brazzaville hafunguwe ku mugaragaro Ambasade y’u Rwanda.

Mu mwaka wa 2011, igihugu cy’u Rwanda na Congo Brazzaville bari bashyize umukono ku masezerano mu by’ubufatanye mu nzego zinyuranye, zirimo iz’ubwikorezi hifashishijwe indege, ingufu, ubukerarugendo, umutekano, ubutabera, ikoranabuhanga, itumanaho n’ibindi.

Ubwo iyi ambasade yafungurwaga ku mugaragaro, Minisitiri w’ububanyi n’amahanga w’u Rwanda Louise Mushikiwabo, yavuze ko kugira ngo iyi Ambasade ibe ifunguwe byahawe ingufu n’umuhate abakuru b’ibihugu byombi bashyize mu gushimangira no geteza imbere umubano mwiza hagati y’ibihugu byombi.

Yagize ati: “Uku gufungura iyi amabasade, bikurikiye umuhate w’abakuru b’ibihugu byacu mu guteza imbere ubufatanye hagati y’u Rwanda na Congo (Brazzaville). Kuva aya masezerano yashyirwaho umukono mu 2011, umubano mu bya dipolomasi wakomeje gutera imbere.”

Minisitiri Mushikiwabo yatangaje ko kuba iyi Ambasade ifunguwe bitanga ishusho yo guteza imbere ubufatanye nk’abanyafurika nkuko abakuru b’ibi bihugu bahora babisaba.

Yagize ati: “Uku gufungura ambasade rero birerekana inyota dufite yo gushimangira iterambere rishingiye ku kwishyira hamwe nk’abanyafurika nk’intego y’abayobozi bacu. Ibisubizo by’ibibazo by’imibereho n’ubukungu uyu mugabane uhura na byo bishingiye ku cyerekezo n’intego imwe.”

Minisitiri Mushikiwabo yasobanuye ko Ibihugu byombi byashyizeho itsinda ry’abahanga bazagenzura niba amasezerano y’ubukungu yashyizweho umukono yubahirizwa, ndetse ngo bakazanagirana inama I Kigali mu ntangiriro z’umwaka wa 2017.

Yasabye kandi abikorera ku giti cyabo kudapfusha ubusa amahirwe bahawe yo gushora imari muri ibi bihugu byombi, aho yabakanguriye gushora imari mu nyungu zabo n’abatuye ibi bihugu.

Ambasade y’u Rwanda muri Congo Brazzaville yanahawe ubushobozi bwo guhagararira inyungu z’u Rwanda mu bihugu bitandatu bihuriye mu muryango w’ubukungu bwa Afurika yo hagati CEEAC, ari byo Cameroun, Gabon, Guinee Equatoriale, Tchad, Repubulika ya Central Africa na CEEAC ubwayo.

U Rwanda rwari rwafunguye ambasade yarwo muri iki gihugu muri Werurwe 2015, ndetse muri Kanama uwo mwaka rwohereza Dr. Habyarimana Jean Baptiste kuruhagararirayo nka Ambasaderi, ariko akaba yakoraga Ambasade y’u Rwanda muri iki gihugu itarafungurwa ku mugaragaro.

Ambasade ya Congo Brazzaville yo yafunguwe I Kigali mu mezi atatu ashize.

Yisangize Inshuti.

Ibitekerezo

Tanga Igitekerezo