U Rwanda rushyigikiye ko Dr Jim Kim akomeza kuyobora Banki y’Isi

Perezida Kagame na Dr Kim Yong Jim ubwo bari mu nama yiga ku bukungu bw’isi (WEF)

Perezida Paul Kagame yavuze ko u Rwanda rwiteguye gushyigikira umuyobozi wa Banki y’Isi, Dr Jim Yong Kim, mu matora ataha kuko afite ibigwi bikomeye mu guteza imbere ibihugu bikiri mu nzira y’amajyambere kandi yagaragaje ubwitange muri manda ya mbere yayoboye.

Ni mu kiganiro n’Abanyamakuru gihuriyemo Perezida wa Repubulika y’u Rwanda Paul Kagame na Perezida wa Benin wari wasuye u Rwanda, Patrice Talon bose bavuze ko bashyigikiye Dr Jim Kim uzarangiza Manda ye muri Kamena 2017.

Perezida wa Repubulika Paul Kagame yavuze ko nta cyabuza u Rwanda kumushyigikira mu gihe yaba agiriwe icyizere n’ababishinzwe kuko bisaba ko Leta Zunze Ubumwe z’Amerika ibiha umugisha.

Yavuze akurikije ibyiyumvo bye cyangwa ibikorwa bigaragara by’umwihariko nka Perezida w’u Rwanda ndetse abirebeye mu buryo bwagutse, Dr Jim Kim, yafashije Banki gukora inshingano neza mu bijyanye n’iterambere ry’ibihugu birimo n’u Rwanda.

Perezida Kagame kandi yagaragaje ko adashidikanya ku bishobozi bw’uyu mugabo haba ku bigwi afite ndetse n’ubushake yagaragarije ibihugu.

Yagize ati “ By’umwihariko uyu muyobozi Dr Jim Kim wayoboye manda ya mbere, afite ibigwi bihambaye mu iterambere, ndetse yagaragaje ubushobozi bwo gushyira mu bikorwa byo bigwi mu bikorwa mu myaka yashyize.”

JPEG - 79.4 kb
Perezida Patric Talon i Buryo, na Perezida Paul Kagame bamuvuze ibigwi

Ngo amuzi mu bikorwa bitandukanye aho yagiye agaragaza n’ubwitange haba mu iterambere no kubungabunga ubuzima kuko ari n’umwe mu bashinze umuryango witwa “Partners in Health” wagize uruhare mu kurwanya indwara z’ibyorezo.

Avuga ko agendeye ku bigwi amuziho, amufata nk’umugabo ushoboye, witangira akazi ndetse by’umwihariko wagiriye akamaro ibihugu biri mu nzira y’iterambere. Ati “ Ugendeye kuri ibyo urumva ko twiteguye kumushyigikira … Ngendeye ku biganiro twagiranye na Perezida wa Benin ntekereza ko ibitekerezo byacu bidahabanye.”

Ibi kandi byashimangiwe na Perezida wa Benin, Patrice Talon, wavuze ko uyu muyobozi yagaragaje ko afite ubushobozi bwo kuyobora Banki y’Isi kuko yatumye Banki ikora inshingano zayo zo kwimakaza iterambere.

Yagize ati “Twebwe nk’ibihugu by’Afurika, by’umwihariko kuri Benin yagiriwe akamaro na Banki, ngendeye ku bigwi bye, akwiye kugirirwa icyizere.Ni umukandida kuri uyu mwanya…kuri twebwe tugomba gumushyigikira mu buryo bugaragara turi mubo bifitiye inyungu”

Jim Yong Kim, ni inzobere mu buganga ifite ubwenegihugu bwa Koreya n’Amerika ni we akaba yaratorewe kuyobora Banki y’isi mu gihe cy’imyaka itanu asimbuye Umunyamerika Robert Zoellick, hari kuwa 16/04/2012.

Jim Yong Kim wavutse muri 1959 y’amavuko azwiho kugira uruhare mu kurwanya indwara z’ibyorezo nka SIDA n’igituntu mu bihugu biri mu nzira y’iterambere.Ku buyobozi bwe azwiho no gushyiraho uburyo bwo gutabara bwihuse ahagaragaye indwara z’ibyorezo ndetse no gufasha ibihugu biri mu nzira y’amajyambere kwihuta.

Banki y’Isi isanzwe ifasha u Rwanda mu mishinga y’Iterambere itandukanye mu buhinzi, ubuzima, ingufu, uburezi ndetse no mu guteza imbere imitangire ya serivisi mu nzego z’ibanze.

Yisangize Inshuti.

Ibitekerezo

Tanga Igitekerezo