Rulindo: Kamarampaka yabongereye ubushake n’amatsiko byo gutora Perezida

Mugabo Sakindi Jean Bosco, umuyobozi w’ihuriro ry’imiryango itari iya Leta mu Karere ka Rulindo

Mu gihe Komisiyo y’igihugu y’amatora ivuga ko kuba amatora ya Perezida azaba nyuma y’igihe gito abaturage batoye kamarampaka bishobora kugabanya ubushake bwo gutora n’umubare w’abazatora bitewe nuko hari bamwe bibwira ko bamaze gutora Perezida, ab’i Rulindo bo ngo kamarampaka yabongereye amatsiko n’ubushake byo gutora.

Umunyamabanga Nshingwabikorwa wa komisiyo y’igihugu y’amatora Charles Munyaneza aherutse kubwira abanyamakuru ko imyumvire y’abaturage ku gutandukanya kamarampaka n’amatora ya Perezida ari imwe mu mbogamizi iyi komisiyo ifite mu matora ya Perezida azaba muri Kanama uyu mwaka.

Izi mpungenge, Munyaneza yazigaragaje ashingiye ku kuba hari abaturage bemezaga ko bamaze gutora Perezida kandi icyo gihe bari bamaze gutora kamarampaka yo kuvugurura Itegeko Nshinga.

Abaturage batandukanye mu karere ka Rulindo babwiye Makuruki ko iyi myumvire bo yamaze kubavamo kuri ubu bakaba bavuga ko ahubwo Kamarampaka yabateye amatsiko yo gutora Perezida wa Repubulika.

Rukema Leonald wo mu Murenge wa Base mu kagari ka Cyohoha, mu mudugudu wa Bukangano yashimangiye ibi agira ati: “Twiteguye gutora ingirakamaro, nanjye niko biri, nyuma yo gutora Kamarampaka ndumva nshaka gutora Perezida.”

Nyirasafari Clementine utuye mu kagari ka Rwamahwa mu murenge wa Base we yagize ati: “kuri njye ndumva nyuma yo gutora kamarampaka nta gucika intege, ngomba gutora Perezida.”

Mukunde Idarlic uyobora akagari ka Gasiza mu murenge wa Bushoki, avuga ko abaturage batindiwe n’itariki y’amatora bitewe nuko bagize uruhare mu kuvugurura Itegeko Nshinga.

Mukunde yagize ati: “Abaturage bo baratwibwirira bati twebwe twahinduye itegeko nshinga, rero ni ngombwa ko tugomba kwitorera na Perezida, ubona ari naho ubushake buva cyane.”

Mugabo Sakindi Jean Bosco, umuyobozi w’ihuriro ry’imiryango itari iya Leta, amatorero n’amadini (sosiyete civile) avuga ko kuba abaturage bagiye gutora Perezida nyuma yo gutora kamarampaka byabongereye ubushake bwo gutora Perezida.

Yagize ati: “Abaturage b’i Rulindo ngewe mbona bamaze kumenyera amatora, ikindi gituma mbona amatora azaba meza kurushaho bikaba n’ibirori ni uko bagize uruhare runini mu gusaba ko Itegeko Nshinga rihinduka. Iyo ndebye ubushake bari bafite bahaguruka ahangaha benshi bashaka no kwigira mu Nteko ndabona ngewe aya matora bayategereje cyane.”

Amatora ya Perezida azaba ku itariki 3 Kanama (ku banyarwanda baba mu mahanga) no kuri 4 Kanama ku baba mu Rwanda, Komisiyo y’amatora ikaba ifite intego ko yazitabirwa ku kigero kitari hasi ya 98%.


Mukunde Iderlic uyobora akagari ka Gasiza mu murenge wa Bushoki. mu karere ka Rulindo
Nyirasafari Clementine utuye mu murenge wa Base mu karere ka Rulindo.

Rukema Reonald utuye mu murenge wa Base mu kagari ka Cyohoha

Yisangize Inshuti.

Ibitekerezo

Tanga Igitekerezo