RDC : FDLR yongeye guhabwa na Monusco amahirwe ivuga ko ari aya nyuma

Abarwanyi b’umutwe wa FDLR

Nyuma y’uko abarwanyi b’umutwe wa FDLR bahawe igihe cyo kuba bashyize intwaro hasi ariko bikagaragara ko iki gikorwa kitabiwe n’umubare muto hagereranyijwe n’umubare w’abarwanyi bagize uyu mutwe ukigaragara mu mashyamba ya Kongo Kinshasa, Monusco yongeye gutangaza ko itanze amahirwe ya nyuma kuri uyu mutwe bitaba ibyo hakifashihswa ingufu za gisirikare.

Mu kiganiro n’abanyamakuru kuri uyu wa Gatatu tariki ya 4 Kanama 2014 Martin Kobler, Umunyamabanga Mukuru wa Monusco yatangaje ko umutwe wa FDLR uhawe amahirwe ya nyuma ngo urambike intwaro hasi ibyo byananirana hakifashishwa ingufu za gisirikare aho yagaragaje ko zaba ingabo ze ndetse n’iza Leta ya Kongo Kinshasa ubu biteguye kuba bahita batangira urugamba mu gihe ibi byasabwe uyu mutwe bitaba byubahirijwe.

Martin Kobler kandi yavuze ko iki gihe kitabarirwa mu byumweru ahubwo kibarirwa mu minsi gusa ntiyagaragaje iyo minsi umubare wayo. Aha yagize ati: « Ni amahirwe ya nyuma kugirango umutwe wa FDLR ushyire intwaro hasi mu mahoro n’abawugize bose kani iki gihe kirabarwa mu minsi, si mu byumweru »

Nk’uko tubikesha radio okapi, Martin Kobler ngo asanga kuba abamaze gushyira intwaro hasi babarirwa mu ijana na mirongo ari uburyo bwo kugirango habeho gukereza ibikorwa bya gisirikare biteganywa kwifashishwa mu guhashya uyu mutwe.

Umutwe wa FDLR ukaba wari wiyemeje kuba washyize intwaro hasi wose ku itariki ya 30 Gicurasi 2014, ariko kugeza ubu abamaze gukora icyo gikorwa bakaba babarirwa muri 150 aho amakuru amwe avuga ko n’aba babashije kuzishyira hasi ari abasaza ndetse n’abarwaye indwara zikomeye.

Yisangize Inshuti.

Ibitekerezo

Tanga Igitekerezo