Politiki mbi, abayobozi babi bishe abantu twagombaga kubakura mu nzira– Perezida Kagame

Perezida Kagame yemeza ko abaturage bakwiye kubona ibyo baba bagenewe kugira ngo bagire ubuzima bwiza

Perezida wa Repubulika y’u Rwanda , Paul Kagame ashimangira ko mbere y’imyaka 22 abanyarwanda bari baraboshywe n’ubutegetsi bubi ndetse na Politiki yabwo mbi itaratumaga hari icyo bageraho, bityo ngo urugamba rwo kubohora igihugu rwagombaga gushyikira kuri abo bayobozi n’abari babashyigikiye kugira ngo bavanwe mu nzira abanyarwanda babashe kubona ibyo bakwiye.

Ibi biza bisa n’ibishimangira ibyo abaturage batandukanye bakunda kuvuga bashimangira ko ubutegetsi bwa mbere ya Jenoside yakorewe abatutsi mu mwaka w’1994, bwabahezaga kuburyo nta bikorwa by’amajyambere bagiraga kuburyo bavuga ko babaga barasigaye inyuma ku buryo bugaragara.

Ubwo yifatanyaga n’abaturage b’umurenge wa Rweru mu kwizihiza umunsi wo kwibohora ku nshuro ya 22, Perezida Kagame yashimangiye ko abaturage baba bafite uburenganzira bwo kubona ibyo bakwiye, bityo ko mu rugamba rwo kwibohora bagombaga gukura mu nzira abayobozi n’abari babashyigikiye bari bafite politiki mbi itarahaga abaturage ibyo bakwiye ndetse bakanagerekaho kubica.

Yagize ati: “Kwibohora kwa mbere rero icyo kwari kuvuze byari ukuvuga ngo imiyoborere mibi, politiki mbi, abayobozi babi baheza abantu mu icuraburindi, abantu batazi amashanyarazi, batazi amashuri, batazi imihanda, batazi kuba mu mazu meza, byari uguhangana na bo ngo bave mu nzira. Usibye ko ahubwo si ibyo gusa babuzaga abantu, bababuzaga n’ubuzima, batwaye ubuzima bw’abantu. Bishe abantu ntabwo ari ukubuza abantu iby’ibanze gusa, ahubwo bababujije n’ubuzima, bica abantu batagira umubare. Uko kwibohora kw’intambwe ya mbere kwari ukuvana iyo politiki mbi mu nzira, abayishyigikiye mu nzira ngo bajye iruhande kuko ntabwo ari ho bakwiriye kuba bari.”

Perezida Kagame kandi yabwiye aba baturage ko ibyo byamaze gukemuka bakaba barasingiriye intambwe yo kugana ku iterambere, bityo abasaba kuyigiramo uruhare rugaragara kugira ngo bazabashe kugera ku byo bifuza.

Yagize ati: “Intambwe ya kabiri rero ni iyi ngiyi duhora tubabwira kandi dushaka ko dukomeza gufatanya buri wese akagira uruhare, buri wese inyungu yo kwibohora ikamugeraho kandi agatanga umusanzu we. U Rwanda aho rugeze imyaka 22 nyuma yo kwibohora, ni kure, tugeze kure muri iyo ntambwe.”

Nubwo Perezida Kagame avuga ko u Rwanda rumaze gutera intambwe igaragara mu kwiteza imbere, yibukije aba baturage ko urugendo ari rurerure kugira ngo inzitizi ziri imbere zibashe gukurwaho kugira ngo iterambere igihugu cyifuza ribashe kugerwaho.

Mu byo abanyarwanda bishimira kuba bamaze kugezwaho nyuma y’imyaka 22 Jenoside ihagaritswe, birimo kuba abenshi baregerejwe amazi meza, amashanyarazi, amashuri, amavuriro, ikoranabuhanga n’ibindi.

Abanyarwanda kandi bishimira ko bongeye kunga ubumwe nyuma y’icuraburindi baciyemo mu gihe cya Jenoside ubu bakaba babana mu mahoro, ndetse no kuba umutekano ari wose, ibintu n’abanyamahanga badahwema kugaragaza.

Yisangize Inshuti.

Ibitekerezo

Tanga Igitekerezo