Perezida wa Mali yashimiye u Rwanda ku butabazi bwarwo ubwo aba-Tuareg bashakaga ubutegetsi

Perezida Ibrahim Boubacar Keïta

Perezida wa Mali Ibrahim Boubacar Keïta yashimiye cyane Leta y’u Rwanda yemeye kohereza abapolisi bayo kugarura amahoro muri icyo gihugu, ubwo inyeshyamba z’aba-Tuareg zashakaga ko uduce tumwe twigenga.

Mu nama ya Transform Africa 2017, umwe mu bayitabiriye yabajije Perezida Keita uburyo igihugu cye cyiteguye guteza imbere uduce twose tugize igihugu mu ikoranabuhanga , mu gihe hari utukirangwamo umutekano muke.

Perezida Keita yavuze ko Leta ayoboye yiteguye kugirana ibiganiro n’abayirwanya bose, icyakora ngo ikibazo nuko bamwe mu bayirwanya badashaka ibiganiro.

Mu mwaka wa 2012 nibwo aba-Tuareg zifatanyije n’abandi baturage bo mu gace ka Zawad mu majyaruguru ya Mali batangije imirwano igamije kubohora ako gace kakagira ubwigenge.

Kubera ubwinshi bw’intwaro z’intambara n’akavuyo mu gisirikare cya Leta byavaga muri Libya, bamwe mu basirikare bakoze coup d’Etat noneho byongerera umurindi aba-Tuareg dore ko n’ingabo ubwazo zari zatangiye gucikamo ibice.

Muri Nyakanga 2013, Umuryango w’Abibumbye wemeje kohereza ingabo zo kubungabunga amahoro muri icyo gihugu, zikarinda by’umwihariko abaturage bo mu duce twibasiwe.Ku ikubitiro hoherejwe ingabo ibihumbi bitandatu zivuye mu bihugu bitandukanye, muri izo ngabo hari harimo n’abapolisi b’u Rwanda.

Izo ngabo ni nazo zaje kugira uruhare mu matora yabaye muri uko kwezi, akegukanwa na Ibrahim Boubacar Keïta.

Asubiza ikibazo yari abajijwe, Perezida Keita yabane gushimira Perezida Kagame n’abanyarwanda, kuba barafashe iya mbere mu kohereza ingabo kugarura amahoro muri Mali.

Yagize ati “Mu ngabo za mbere zageze muri Mali hari harimo n’iz’u Rwanda , turabashimira cyane.Ntabwo twakunze kugira igihugu gifite amahoro kuko abafitanye ibibazo ntabwo biradukundira guhuriza hamwe ngo bose baganire.”

Keita yavuze ko Leta ye ifite ubushake bw’ibiganiro, ariko ngo hari abayirwanya batabikozwa.

Ati “Abataragize uruhare mu biganiro by’amahoro baracyateza umutekano muke mu gihugu, bica buri munsi abavandimwe bacu baza kubungabunga amahoro muri Mali.”

Icyakora uwo mukuru w’igihugu avuga ko hari byinshi bigikorwa ngo igihugu kigarukemo umutekano, n’uudce twibasiwe tugezwemo ibikorwa by’iterambere.

Mali nicyo gihugu cya gatatu ku isi cyoherejwemo umubare munini w’ingabo za Loni zishinzwe kubungabunga amahoro.

Kuri ubu u Rwanda ruza ku mwanya wa gatanu ku isi mu kugira ingabo nyinshi mu butumwa bw’amahoro, kuko rufitemo abasaga 5000 harimo ingabo n’abapolisi.Muri 2015 Perezida Kagame yatangaje ko u Rwanda rwiteguye kongeramo izindi ngabo zigera ku 1600.

Yisangize Inshuti.

Ibitekerezo

Tanga Igitekerezo