Perezida w’Inteko Nyafurika yashimiye u Rwanda umuvuduko rufite mu mishinga ya AU

Umuyobozi w’inteko ishinga amategeko ya Afurika Roger Nkodo Dang kuri uyu wa kane yasuye Perezida wa Sena y’u Rwanda, ashima intambwe y’u Rwanda mu kwemeza amwe mu basezerano agenga iyi inteko ndetse no kwihutisha imishinga y’ubumwe bwa Afurika

Ni uruzinduko uyu muyobozi yagiriye mu nteko ishinga amategeko umutwe wa Sena ahura na Perezida wa Sena y’u Rwanda. Mu kiganiro aba bayobozi bombi bahaye itangazamakuru nta ngingo y’umwihariiko bagaragaje baganiriye ariko bose bashimangira ko ari uruzinduko rugamije kumenyana.

Mu bwirwaruhame ye, uyu muyobozi w’inteko nyafurika yashimye u Rwanda umuvuduko rufite mu gushyira mu bikorwa imishinga y’umuryango wa Afurika yunze ubumwe. Ati:”Twaje hano gusura inzu yacu kuko inteko ishinga amategeko nyafurika ikorana n’inteko zishinga amategeko z’ibihugu, ni yo mpamvu twaje gusura Perezida wa Sena y’u Rwanda nk’i igihugu cya kabiri cya sinye amasezerano agenga inteko ishinga amategeko nyafurika, ni igihu cyemera abanyafurika bose kuko nk’ubu twaje hano tudasabwe gushaka viza, ni igihugu rero cyatangiye gushyira mu bikorwa ibyo twaje kwigaho hano ,ni yo mpamvu rero tugomba gushimira abayobozi b’u Rwanda.”


Roger Nkodo Dang umuyobozi w’inteko ishinga amategeko nyafurika

Uyu muyobozi yagarutse ku mibereho y’abanyafurika avuga ko bagomba gukosora imikorere bakirinda gukoresha ibikoresho batumije kandi ibyo bafite babitanga batabikoresheje. Ati:”Ibyo dufite ntabwo tubikoresha kandi tugakoresha ibyo dutumiza, ni ngombwa rero ko abanyafurika bakoresha ibyabo mbere y’uko babyohereza hanze ngo bakoreshe ibyo batumiza”

Perezida wa sena y’u Rwanda Hon Makuza Bernard na we yagaragaje ko uru ruzinduko rwari mu rwego rwo kurushaho kumenyana . Yavuze ko yaje gusuhuza abagize inteko ishinga amjategeko y’u Rwanda ari na yo mpamvu yari yaje kubonana n’abagize biro ya Sena.

Gusa ariko anavuga ko banaboneyeho kuganira imwe mu mishinga y’amategeko y’Afurika yunze ubumwe. Ati:”Ikindi ni uko twaboneyeho no kuganira ku masezerano atandukanye yo ku rwego rwa Afurika yunze ubumwe. Hari amasezerano agera kuri 49 ariko u Rwanda rukaba ari byiza rubarirwa mu bihugu 5 bya mbere byamaze gusinya kwemeza burundu agera kuri 30 hakaba hasigaye agera kuri 18 kandi nayo urebye ni n’ibintu dusanzwe dukora hano ni ikibazo cy’igihe gusa cyo kugirango bizanyure mu nzira ziteganywa n’amategeko”


Makuza Bernard, Perezida wa Sena y’u Rwanda

Inteko nyafurika ikorera muri Afurika y’Epfo kugeza ubu iracyafatwa nk’urwego ngishwanama kuko itaragira ububasha bwo gutora ngo inashyireho amategeko gusa ariko bikaba biri mu nzira zo kutorwa kugirango ihinduke inteko igena ikanshyiraho amategeko.

Yisangize Inshuti.

Ibitekerezo

Tanga Igitekerezo