Perezida Talon, uzwi nk’umwami w’ipamba muri Afurika uri mu Rwanda ni muntu ki?

Perezida wa Benin Patrice Talon yavutse kuwa 1 Gicurasi 1958, avukira mu gace ka Déguè-Gare mu mujyi wa Porto-Novo akaba yaratangiye kuyobora iki gihugu guhera kuwa 6 Mata 2016.

Perezida Patrice Talon yize amashuri ye i Dakar muri Senegal ndetse na Toulouse mu Bufaransa, yiga ibijyanye n’’Imibare n’ubugenge ariko aza kumenyekana mu bucuruzi bw’ibikomoka ku buhinzi ndetse anamenyekana mu bikorwa by’amahoteli.

Kuva mu myaka ya 1980 Patrice yakoraga ubucuruzi bw’ipamba. Uyu mugabo ufite imyaka 58 , ni umutunzi ukomeye wakuye amafaranga menshi mu kugurisha hanze ipampa, igicuruzwa gikomeye mu gihugu cye ndetse akaba afatwa nk’umwami w’ipamba kubera uruhare yagize mu nganda ziritunganya.

Ibindi bikorwa bitandukanye afite

. Ubucuruzi bw’Inyongeramusaruro abinyujije muri Sosiyeti ya SDI muri Benin na Côte d’Ivoire

. Ubucuruzi bw’Ipamba abinyujije muri Sosiyete zitandukanye nka: Industries Cotonnières Associées (ICA) na Société pour le Développement du Coton (SODECO) muri Bénin.

. Amahoteli: Afite Hoteli Novoteli na IBIS zimwe mu zikomeye muri Benin

. Serivisi: Sosiyeti ya Agence de Transit et de Logistique (Atral), Terminal d’Allada (port sec)

Mu bushabitsi bwe kandi abifatanya na Politiki aho yagendaga agira inama abakandida, amashyaka ndetse akabatera inkunga.Abavugwa cyane ni Nicéphore Soglo mu matora ya Perezida wa Benin muri 1991, mu matora y’abadepite mu 1995 na bwo yafashije amwe mu mashyaka ya Politiki .

Muri 2006 Talon ni umwe mu bateye inkunga Perezida wacyuye igihe Boni Boni, wari urangije manda ebyiri yemererwa n’amategeko.

Ipamba muri Benin ryihariye 40% by’amafaranga yinjira mu gihugu avuye mu byoherezwa hanze na 12% by’umutungo mbumbe w’igihugu ndetse 60% by’inganda mu gihugu ziritunganya.


Patrice Talon na Perezida Kagame bameranyijwe umubano utajegajega ushingiye ku buhahirane

Ubwo uyu mugabo yatorerwaga kuyobora iki gihugu, yavuze ko afite umugambi wo kugabanya imyaka umukuru w’igihugu amara ku butegetsi akayigira manda imwe gusa y’imyaka itanu.

Nkuko ikinyamakuru Jeunafrique cyamusobanuye, ngo ubusanzwe ni umugabo utajya acika intege, wicisha bugufi, ugira uburyo bwinshi bwo gukora ibintu, ni umunyabwenge, akunda gukora ibintu yitonze kandi ijambo avuze arishyira mu bikorwa. Ntakunda kugaragara mu itangazamakuru.

Prezida Patrice Talon umaze iminsi itatu mu Rwanda yanagiranye ibiganiro n’inzego zitandukanye mu rwego rwo kumenya uko igihugu cy’u Rwanda cyongeye kwiyubaka, ndetse anagaragarizwa byinshi bikubiye mu cyerekezo cy’u Rwanda mu myaka iri imbere.

Uyu mugabo mu ruzinduko rwe yasuye ikigo cy’Igihugu gishinzwe Iterambere, RDB, ndetse anagera mu gace kahariwe inganda kazwi nka ’Special Economic Zone’ ndetse agirana ibiganiro byihariye na mugenzi we Perezida Kagame.

Abakuru b’ibihugu byombi kandi bemeranyijwe ku bufatanye mu iterambere, ndetse Prezida Paul Kagame, atangaza ko vuba aha indege ya sosiyete Rwandair, izatangira ingendo i Cotonou muri Benin mu rwego rwo koroshya ingendo n’ubuhahirane hagati y’u Rwanda na Benin.

Yisangize Inshuti.

Ibitekerezo

Tanga Igitekerezo