Perezida Kagame yahamagariye ibihugu bigize EAC kwitangira gukora ibyiza

Perezida wa Repubulika y’u Rwanda Paul Kagame yasabye abayobozi b’ibihugu bigize umuryango wa Afurika y’iburasirazuba gushishikarira gukora ibyiza no gushikama ku cyerekezo ibi bihugu bihuriyeho kugirango bikomeze gushimangira ubumwe n’iterambere ry’uyu muryango.

Ibi, Perezida Kagame yabitangarije mu nama ya 17 idasanzwe y’umuryango wa Afurika y’Iburasirazuba (EAC) yateraniye i Dar es Salaam muri Tanzaniya kuva kuri uyu wa 08 Nzeri 2016.

Perezida Kagame yashimangiye akamaro ko kwihuriza hamwe nk’ibihugu avuga ko ari amahirwe yo gukora ibishoboka byose bakagera kuri byinshi byiza biruseho.

Yagize ati: “Ndashimira abavandimwe bo mu gihugu cya Sudani y’Epfo kuba barinjiye bidasubirwaho mu muryango wa Afurika y’Iburasirazuba, dukeneye gukomeza gushishikarira icyerekezo duhuriyeho nka Afurika y’iburasirazuba tugakomeza kwitangira gukora ibyiza biruseho, uyu muryango utuma dufatanya tugakomera kuruta uko buri wese yaba ameze abaye akora ari umwe, icy’ingenzi ni uko imyanzuro dufata itagomba kugira uwo ibangamira”

Muri iyi, nama Hon. Christophe Bazivamo yarahiriye kuba Umunyamabanga mukuru wungurije wa EAC akaba ari we wungirije Ambasaderi Liberat Mfumukeko ukomoka mu gihugu cy’u Burundi.

Perezida Kagame yashimiye Hon. Christophe Bazivamo nk’umunyarwanda witwaye neza akagirirwa icyizere cyo gutorerwa kuba umunyamabanga mukuru wungirije w’uyu muryango amusaba kuzakora nk’umunyafurika y’iburasirazuba.

Ati: "Ndashimira umunyamabanga wungirije mushya, mwifurije kandi we na bagenzi be kuzagira manda irangwa no kugera ku nshingano no kugera ku mirimo itanga umusaruro, agiye kuzakora nk’umunyafurika y’iburasirazuba cyane kurusha uko ari umunyarwanda"


Bazivamo yarahiriye inshingano nshya yahawe muri EAC

Muri iyi nama kandi hizwe ku cyemezo cyo gusinya amasezerano y’ubucuruzi ahuza EAC n’umuryango w’ubumwe bw’ibihugu by’iburayi (EU) maze abitabiriye iyi nama biha andi mezi atatu yo kwiga kuri aya masezerano.

Aya masezerano yiswe [ Economic Partnership Agreement,( EPA)] ibihugu by’u Rwanda na Kenya byamaze kuyashyiraho umukono, Uganda na yo yamaze kugaragaza ko yishimiye aya masezerano ariko ibihugu bya Tanzaniya n’U Burundi byo byakomeje kugaragaza imbogamizi mu gusinya aya masezerano.

Muri iyi nama, Perezida John Pombe Magufuli uyoboye EAC, yavuze ko hagikenewe ikindi gihe cyo kwiga kuri aya masezerano kugirango ibihugu byose bigize uyu muryango bibanze biyasesengurane ubushishozi kugirango harebwe niba koko bikwiye kuyasinya.

Magufuli yavuze ko abayobozi b’ibihugu bigize EAC bazongera guhura mu mwaka utaha bakongera kuyaganiraho mu rwego rwo kuyanonosora. Ati: “Twihaye amezi atatu yo kuganira byimbitse ku gusinya amasezerano ya EPA, tuzahura muri Mutarama 2017 tunonosore iki kibazo.”

Iyi nama yitabiriwe n’aba Perezida batandukanye barimo Perezida Dr John Pombe Magufuli wa Tanzania, Yoweri Museveni wa Uganda, Paul Kagame w’u Rwanda na Visi Perezida wa Kenya William Ruto. Ibihugu by’U Burundi na Sudani y’Epfo byo bikaba byari byohereje intumwa zibihagararira muri iyi nama.


Abakuru b’ibihugu biyemeje kwitangira gukora ibyiza


Perezida wa Tanzaniya Dr Pombe Magufuli uyoboye EAC


Perezida Kagame yifurije Bazivamo imirimo mishya mihire


Minisitiri w’ububanyi n’amahanga w’u Rwanda Louise Mushikiwabo na we yari yitabiriye iyi nama


Iyi nama yari yitabiriwe n’abayobozi mu nzego zitandukanye

Soma inkuru bifitanye isano hano: http://makuruki.rw/Politiki/article/Inama-ya-EAC-yitabiriwe-na-Perezida-Kagame-iriga-kuki

Yisangize Inshuti.

Ibitekerezo

Tanga Igitekerezo