Perezida Kagame yashimye ubwitabire bw’ibihugu muri ’Smart Africa’ , asaba kongera ubufatanye

Perezida Kagame yashimye intambwe ibihugu bya Afurika byateye mu kwitabira umushinga wa ’Smart Africa’ ashimangira ko kongera ubufatanye ari byo bizatuma ikoranabuhanga rigera kuri bose.

Ibi yabitangarije kuri uyu wa 31 Mutarama 2017, ubwo yatangizaga inama yahuje abayobozi b’uyu mushinga wa ’Smart Africa’ ugamije guteza imbere ikoranabuhanga mu guhindura imibereho y’Abaturage batuye umugabane wa Afurika.

Agaragaza uburyo ibihugu bya Afurika byishimiye iyi gahunda yo guteza imbere ikoranabuhanga, Perezida Kagame uyobora inama y’ubuyobozi ya Smart Africa yavuze ko ibihugu bigenda biyitabira ku bwinshi kuko yatangiye muri 2013 igizwe n’ibihugu 7 ariko ubu ikaba imaze gushyigikirwa n’ibihugu 17.

Ati: "Kwishyirahamwe kwacu kwatangiriye ku bihugu birindwi none ubu tumaze kuba ibihugu 17 bigizwe n’isoko ry’abantu miliyoni 360, uku kwaguka kuraha imbaraga ikoranabuhanga mu guhindura no guteza imbere abaturage bacu.”

Yavuze ko ibi bikwiye kujyana no kugeza ikoranabuhanga ku baturage kubw’iterambere ryabo mu gihe isi ikomeje kwinjira muri gahunda y’impindura matwara ya kane.

Yavuze ko gahunda ya Smart Africa isaba ko ibihugu bihuza amahirwe bifite maze buri gihugu binyuze muri uko kwihuza kikagerwaho n’ikoranabuhanga rya interineti yihuta.

Ati: “Isi ikomeje kwinjira mu mpinduramatwara ya kane y’ibikorwa bishingiye ku ikoranabuhanga. Imbogamizi yacu ni ukugendana n’abandi mu gukwirakwiza umurongo mugari wa interineti hose. Kugirango ingo, ibiro, amashuri n’imijyi bya Afurika bibe bisirimutse, tugomba guhuza amahirwe ahari mu kwihutisha ikoranabuhanga.”

Ubwenge karemano,gukoresha amarobot, Drone ’ibindi, ni bimwe mu byo Perezida Kagame yagarutseho ku bijyanye no gukoresha ikoranabuhanga.

Gahunda ya Smart Africa yatangirijwe mu nama ya Transform Africa yabereye i Kigali mu Ukwakira 2013. Iyi gahunda ifite intego zo guteza imbere ubukungu no guhindura ubuzima bw’abaturage binyuze mu gukoresha ikoranabuhanga rigezweho.

Perezida Kagame yasoje aha ikaze abanyamuryango bashya ndetse aha ikaze abari muri iyi nama mu nama ya Transform Africa ya 2017 izabera i Kigali hagati ya tariki 10 na 12 Gicurasi 2017.


Minisitiri w’urubyiruko n’ikoranabuhanga Jean Philibert Nsengimana (ubanza ibumoso) na we yari muri iyi nama

Yisangize Inshuti.

Ibitekerezo

Tanga Igitekerezo