Kwamamaza

Politiki

Perezida Kagame yasabye ubufatanye mu kugoboka abimukira bari muri Libya

Yanditswe

kuya

na

Jean Paul Niyitanga
Perezida Kagame yasabye ubufatanye mu kugoboka abimukira bari muri Libya

Perezida wa Repubulika y’u Rwanda Paul Kagame uri mu nama ihuza umuryango w’ubumwe bw’Uburayi n’uw’ubumwe bw’Afurika yavuze ko yakenewe ubufatanye mu gukemura ibibazo byugarije Afurika birimo n’icy’abimukira bari mu kaga mu gihugu cya Libya n’ahandi hirya no hino.

Kuva ku wa 29 kugeza kuri uyu wa 30 Ugushyingo 2017, i Abidjan muri Côte d’Ivoire hateraniye inama ihuza Umuryango wa Afurika Yunze ubumwe n’umuryango w’Ubumwe bw’Uburayi ifatwa nk’iyo gushimangira imikoranire y’umugabane wa Africa n’uw’Uburayi.

Muri iyi nama, ikibazo cy’abimukira b’abanyafurika bari muri Libya n’ahandi hirya no hino muri Afurika bari mu kaga kimaze iminsi kivugwa cyagarutsweho na Perezida Kagame.

Aba bimukira bakunze kuba bari mu Majyaruguru y’uburasirazuba bwa Afurika bagerayo bavuye mu bindi bihugu bagambiriye kwambuka inyanja ya Méditerranée ngo bajye i Burayi gushaka ubuzima burushijeho kuba bwiza.

Gusa abenshi ntibakunze guhirwa n’urugendo kuko abatarohamye muri Méditerranée
bahera muri ibyo bihugu nk’abimukira ariko bakaba mu buzima bugoranye ndetse abo muri Libya biherutse kugaragara ko bacuruzwa hagamijwe kubagira abacakara.

Aba bimukira bo muri Libya, u Rwanda ruherutse kugaragaza ubushake bwo kubakira mu Rwanda kugirako bave muri ubwo buzima bubabaje barimo aho rwiyemeje kwakira abagera ku bihumbi 30.

Gusa muri iyi nama, Perezida Kagame yavuze ko hakenewe ubufatanye bw’ibihugu byose bya Afurika mu kugoboka aba bimukira n’abandi bari mu bihugu bitandukanye, ibintu yafashe nk’ikizamini.

Yagize ati: “Ubu ikizamini cy’ubufatanye bwacu, n’ubumuntu bwacu uyu munsi kiri imbere yacu, akaga k’abimukira b’abanyafurika bari muri Libya n’ibimeze nkabyo ahandi tugomba gufatanya tukagira icyo dukora.”

Mu bindi yagarutseho, Umukuru w’igihugu yavuze ko amavugurura y’Umuryango wa Afurika yunze ubumwe akomeje kugeza ubu kandi akaba yitezweho umusaruro haba mu kwigira no kwibeshaho k’umugabane wa Afurika no mu gutuma abaturage bawo by’umwihariko urubyiruko bagira ubuzima burushijeho kuba bwiza.

Ati: “Guha amahirwe, n’ijwi urubyiruko rw’Uburayi n’urwa Africa nibwo buryo bwo kurinda indangagaciro zacu n’ejo hazaza hacu twese.”

Yavuze ko uko Afurika irushaho kwifatira imyanzuro ku bibazo biyugarije kandi igaharanira kwibeshaho ari byo bizatuma ibona abaterankunga baturutse hanze bishimiye gukorana na Afurika kuko ngo ntanuwakwifuza gukorana n’abantu batishoboye cyangwa bakora nabi.

Perezida Kagame yashimangiye ko Afirika ikwiye kwiyishyurira ikiguzi cya gahunda zifitiye akamaro abaturage bayo aho gushyira uwo muzigo ku bafatanyabikorwa ba Afurika.

Yavuze ko imikoranire n’Umugabane w’Uburayi ari ingenzi cyane kuko Uburayi na Afurika ari abaturanyi kandi bagahurira ku bintu byinshi byaba mu mutekano, abimukira, ibidukikije, ubucuruzi n’ishoramari.

IBITEKEREZO

Tanga igitekerezo


Kwamamaza Car Free Day/ 18/02/2018
INKURU ZAMAMAZA 10-08-2018

ITANGAZO RYA CYAMUNARA

Kwamamaza
Perezida KAGAME avuga ku manyanga mu Iyubakwa rya Hotel ya FERWAFA n’ikibazo cy’abana bo ku mihanda
KAGAME avuga kuri za Mission z’abayobozi zidasobanutse
IBYO ABANYAMAKURU BAVUGA KU IYEGURA RYA Fred MUVUNYI ku buyobozi bwa RMC
Uwari V/Perezida w’Urukiko rw’Urukiko rurinda Itegeko Nshinga/ Burundi
RUNIGA avuga uko bazinjira Congo
Ubutumwa bw’Umuturage kuri Perezida KAGAME
Kwamamaza