Perezida Kagame yasabye ibihugu bikize kwikuramo imyumvire ko Afurika irusha abandi ibibazo

Mu kiganiro Perezida Kagame yatangiye mu nama ihuza ibihugu 20 bikize kurusha ibindi ku isi, yabasabye gukuraho imyumvire ivuga ko Afurika ari umugabane uhoramo ibibazo kurusha indi migabane kuko ngo ibibazo bya Afurika bishobora gukemuka binyuze mu bikorera.

Muri iyi nama y’iminsi ibiri ihuza ibihugu bikize, Perezida Kagame yatanze ubutumwa bwibanda ku mikoranire ya Afurika n’ibyo bihugu mu rwego rwo gushakira iterambere Afurika mu gihe kizaza.

Perezida Kagame yavuze ko muri Afurika hari amahirwe y’ishoramari mu bintu bitandukanye cyane cyane mu bikorwa remezo birimo Imihanda, amateme n’ingomero z’amashanyarazi bityo ngo ntabwo Afurika ari umugabane udashobora gushorwamo imari.

Yavuze ko hakenewe ubufatanye hagati y’ibihugu byateye imbere n’ibihugu bya Afurika ababwira ko inkunga zihabwa Afurika zidahagije kugirango Afuka itere imbere.

Ati: "Nubwo inkunga ari ingirakamaro, ntabwo zihagije kugirango zizane iterambere rirambye, dushobora kurenga ibyo Leta n’iyindi zageraho zonyine, Iki ni igihe nyacyo cyo gushyira mu by’ibanze duhuriyeho umubano ushingiye ku bucuruzi n’ishoramari."

Agaruka ku gaciro k’abikorera mu guteza imbere ibihugu bya Afurika, Perezida Kagame yagize ati: "Abikorera bashoboye ni inkingi ikomeye y’ubukungu, hakwiye kubaho kugabanya igiciro cy’ubucuruzi hubakwa ibikorwa remezo bihagije Leta igafasha abikorera. "

Yasabye ibihugu byateye imbere kwikuramo imyumvire yuko Afurika ari wo mugabane urusha indi ibibazo. Ati: "Dukorane kugira ngo dukureho imyumvire ko Afurika irimo ibibazo kurusha andi masoko ari gutera imbere, Ubutumwa ni uko ibibazo bya Afurika bishobora gukemurwa igihe cyose urwego rw’abikorera rubigizemo uruhare.”

Ku bijyanye n’abimukira bava muri Afurika bajya mu bihugu byateye imbere ugasanga bafatwa nk’abateza ibibazo, Perezida Kagame yavuze ko haramutse habayeho imikoranire hagati ya Afurika n’ibihugu byateye imbere, abimukira nta kibazo bateza.

Ati: "Abimukira bazahora bajya mu bihugu biteye imbere, Inshingano yacu ni ukubaka umuryango utekanye, utabogamye kandi wakira bose, aho abaturage n’abimukira bashobora kugera ku iterambere ryabo nk’abantu”

Yababwiye ko igihe kigeze cyo gushyira mu bikorwa ibyo baba baganiriye kuko ngo guhora mu biganiro gusa nta kibazo na kimwe byakemura haba ku ruhande rwa Afurika no ku bihugu byateye imbere.

Iyi nama irimo kubera i Berlin mu Budage kuva kuri uyu wa 12 kugeza 13 Kamena. Yitabiriwe n’ibihugu 20 bikize kurusha ibindi ku isi (G20) ndetse n’abandi batumirwa.

Ibyo bihugu ni Argentina, Australia, Brazil, Canada, u Bushinwa, u Bufaransa, u Budage, u Buhinde, Indonesia, u Butaliyani, u Buyapani, Mexico, u Burusiya, Arabia Saudite, Afurika y’Epfo, Koreya y’Epfo , Turukiya, u Bwongereza, Leta Zunze Ubumwe za Amerika n’Umuryango w’Ubumwe bw’uburayi (EU).

Yisangize Inshuti.

Ibitekerezo

Tanga Igitekerezo