Perezida Kagame yasabwe guhwitura bagenzi be bakagira icyo bakora ku bukene bwugarije inzego za EAC

Perezida w’u Rwanda Paul Kagame yasabwe n’abadepite bagize Inteko Ishinga Amategeko y’Umuryango wa Afurika y’Uburasirazuba (EALA) kubafasha guhwitura abakuru b’ibihugu bigize uwo muryango, ibihugu byabo bigatanga umusanzu byiyemeje mu ngengo y’imari ikoreshwa n’uwo muryango.

Babisabye kuri uyu wa mbere ubwo Perezida Kagame yafunguraga igihembwe kidasanzwe cya gatanu cya EALA.

Hon Daniel Fred Kidega, Perezida wa EALA yavuze ko nubwo hari byinshi bagezeho muri manda y’imyaka itanu bazasoza muri Kamena uyu mwaka, ariko ngo bahuye n’imbogamizi ikomeye yo kubura amafaranga muri bimwe mu bikorwa byabaga biteganyijwe, bitewe no kugenda biguru ntege kwa bimwe mu bihugu mu gutanga umusanzu wabyo.

Yagize ati “Twahuye n’ibihe bikomeye.Cyane cyane ibijyanye n’abamafaranga.Aba bagabo n’abagore bari imbere yanyu, bakoraye ubwitange muri komite zabo, badahabwa amafaranga bemerewe.Ndabashimira ku bw’ubwo bwitange.”

Ýakomeje agira ati “Umuryango, Inteko, Urukiko ndetse n’Ubunyamabanga (bya EAC) ndetse n’izindi nzego bari mu bibazo by’amafaranga bidasanzwe bibangamira ingufu dushyira muri gahunda zo kwishyira hamwe.Ndabasaba nyakubahwa, mu bunararibonye bwanyu kuzaganira n’abavandimwe banyu mu nama, kugirango ibihugu bigize umuryango bitange umusanzu wabyo mu muryango.”

Mu kiganiro n’abanyamakuru Hon Kidega yavuze ko kudatanga neza imisanzu kwa bimwe mu bihugu, byatumye hari imwe mu mirimo yahagaratswe cyangwa ikagendeshwa buhoro, kandi yari yarapanzwe mu ngengo y’imari ya 2016/2017.

Yatanze urugero rw’aho inteko Ishinga Amategeko y’Umuryango yahagaritse imwe mu mirimo yayo cyangwa ikayikomatanya muri Nzeli n’Ukwakira umwaka ushize kubera nta mafaranga yari ahari yo gukoresha.

Yatanze kandi urugero rw’aho ubu bari kwifashisha imodoka rusange mu gutwara abagize Inteko babavana aho bakoreye babageza ku mahoteli bacumbitsemo I Kigali.

Muri Eala hashyizweho komite ishinzwe gukora ubushakashatsi ku ihakana n’ipfobya rya Jenoside ndetse n’imvugo z’urwango mu Karere, ariko nayo ntirabasha gukora kuko nta mafaranga.

Yagize ati “Yego hari ikibazo cy’ihungabana ry’ubukungu mu Karere ndetse no ku isi hose, ariko sirwo rwitwazo ku ngengo y’imari tuba twaramaze gupanga. Rwose nibashyire mu bikorwa ibyo biyemeje kandi binateganywa n’amategeko.”

Yavuze ko igihe ibihugu bidatanze umusanzu wabyo bizagorana gushyira mu bikorwa ibyo biyemeje.

Ingengo y’imari ya EAC igenwa n’abaminisitiri bagize inama y’Umuryango wa Afurika y’Uburasirazuba, bakayigena bagendeye ku bushobozi bw’ibihugu byabo.

Ikinyamakuru The Guardian cya sosiyete IPPmedia muri Tanzania, giherutse gutangaza ko Tanzania aricyo gihugu cya mbere kirimo amadeni menshi EAC. Kugera mu mpera za Mutarama uyu mwaka, cyari kimaze kwishyura imisanzu ingana n’amadolari 2 553 203, gisigaramo ideni rya $ 5 284 905.

Uganda yari imaze gutanga $ 7 489 004, isigayemo ideni rya $ 889 104.Kenya yari imaze gutanga $ 4 395 707, isigayemo $ 3 982 400. U Rwanda rwari rumaze gutanga $ 3 999 760, rusigayemo $ 4 378 348, naho u Burundi bwatanze imisanzu ingana na $ 2 029 713, busigayemo umwenda n’ibirarane bya $ 7 119 432.

Amadolari miliyoni 101.4 niyo ngengo y’imari iteganyijwe gukoreshwa na EAC mu mwaka wa 2016/2017.

Igihembwe cya gatanu cy’abadepite bagize EALA, kirateranira mu Rwanda guhera kuri uyu wa Mbere tariki 6 Werurwe, kugeza tariki 17 Werurwe 2017.

Yisangize Inshuti.

Ibitekerezo

Tanga Igitekerezo