Perezida Kagame yanenze abagifite umuco wo kuzarira mu iterambere rya Afurika

1

Perezida Kagame asanga umugabane wa Afurika udateze gutera imbere igihe abawutuye bazaba bataramenya agaciro k’igihe bagakomeza kurangwa n’umuco wo kuzarira mu gushyira mu bikorwa ibyo bemeranyijwe gukora nk’abanyafurika mu rwego rwo twiteza imbere

Ibi Perezida Kagame yabigarutseho ubwo yatangizaga inama mpuzamahanga y’iminsi ibiri yiga ku ishoramari (Global African Investment Summit) iteraniye i Kigali kuva kuri uyu wa 05 Nzeri 2016.

Yavuze ko ibihugu bya Afurika byamaze kumenya agaciro ko kwifatanya nk’ibihugu, ariko avuga ko hakiri ikibazo cyo gutinza ishyirwamubikorwa ry’amasezerano y’imikoranire baba biyemeje bityo bigatuma iterambere rya Afurka rikomeza kudindira.

Yagize ati: "Intambwe yose y’iterambere isaba kubanza guha agaciro igihe no kugikoresha neza, tuzi ko kwishyira hamwe ari ingenzi kuri Afurika , igisigaye ni ugukora ibisabwa ngo bigerweho, kuzarira biterwa no kutamenya ko kwihuta ari urufunguzo rwo guhanga ubukire, sinaba nkabije mvuze ko umuco wo kwihanganira ubukererwe ari imwe mu mpamvu zitera ubukene Abanyafurika, nidutangira guha agaciro igihe, icyuho kiri hagati yacu n’ibindi bihugu kizagabanyuka byihuse"

Yakomeje avuga ko igihe cyo kwihanganira ubukererwe gikwiye kurangira ndetse byanaba ngombwa hagashyirwaho ibihano ku bayobozi b’ibigo batinda gushyira mu bikorwa iby’ibanze basabwa.

Ati: "Hari hakwiye kubaho amande igihe ibigo bya Leta bitubahirije igihe ntarengwa, Afurika ntikwiye gukomeza kurangwa n’amateka yo kugira imitungo itabyazwa umusaruro, hakwiye kubaho impinduka, gusubika iby’ibanze no kuzarira ni amakosa akomeye Afurika ikora, nta kindi dutegereje kuko nta n’ikintu twabuze, dukorere hamwe, twihute maze twubake Afurika twifuza"

Inama ya Global African Investment Summit yitezweho imyanzuro ikomeye ku ishyirwamubikorwa ry’amasezerano yiswe “Tripartite Free Trade Area” (TFTA) ahuriweho n’ibihugu 26 bigize imiryango ya EAC, COMESA na SADC bituwe n’abantu barenga miliyoni 600.

Ni kenshi ibihugu byiyemeza gukora ibintu runaka ndetse akenshi bigashyirwa no mu masezerano ariko ugasanga hari ibihugu bibaye kidobya mu ishyirwa mu bikorwa ry’ayo masezerano bitewe no kuzarira mu kuyemera cyangwa gushyira mu bikorwa ibisabwa, bityo bikabera imbogamizi n’abandi bari bafite gahunda yo kwihuta.

Ibi Perezida Kagame yabigarutseho, avuga ko abatabishaka bari bakwiye kureka ababishaka bakaba ari bo babikora aho kubabera imbogamizi.

Kuri iyi ngingo yagize ati: "Tugomba gukemura vuba imbogamizi zihari kugirango ubu bufatanye bw’inyabutatu bugerweho, Niba hari abatiteguye, abiteguye nibakore ariko basiga icyanzu kugirango n’abandi bakomeze kuza, ntabwo dukeneye guhora twibutswa ko ishoramari, imiyoborere myiza no gushyira hamwe ari ingenzi mu iterambere."

Ni ubwa mbere iyi nama ibereye muri Afurika kuko ubundi yari ikunze kubera mu gihugu cy’Ubwongereza, kuri iyi nshuro haribandwa cyane ku rujya n’uruza rw’abantu n’ibicuruzwa hagati y’ibihugu bya Afurika nk’imwe mu nkingi ziteza imbere ubucuruzi.

Abanyacyubahiro batandukanye bafashe umwanya w’ijambo bashimye intambwe u Rwanda rumaze gutera mu iterambere rubikesheje imiyoborere myiza no kwihutisha imishinga y’iterambere rihuriweho.

Yisangize Inshuti.

Ibitekerezo 1

  1. President aravuga ukuri,kabisa abantu bakora muri service yubutaka (huye)
    aho gukosoza guhererekanya title deed bitwara amazi atanu.

Tanga Igitekerezo