Perezida Kagame yarahije abayobozi bashya, anavuga ku matora ateganyijwe

1

Perezida wa Repubulika y’u Rwanda Paul Kagame yakiriye indahiro ya Depite Niyitegeka Winifrida n’Umuvunyi Wungirije Yankurije Odette abasaba gukora inshingano zabo uko bikwiye.

Kuri uyu wa 07 Nyakanga, nibwo umukuru w’igihugu yakiriye indahiro za Niyitegeka Winifrida warahiriye kuba Umudepite mu Nteko Ishinga amategeko na Yankurije Odette warahiriye kuba Umuvunyi Wungirije.

Niyitegeka Winifrida yasimbuye nyakwigendera Depite Mukayisenga Françoise witabye Imana kuwa Kuwa 12 Kamena 2017.

Kagame yasabye abayobozi barahiye gukora akazi kabo uko bikwiye, baharanira gukora ibiteza imbere abaturage.

Ati " Ndizera ko imirimo izakorwa nkuko bikwiye no ku bayobozi bashya ari n’abasanzwe ariko icyo twumva ni ugushyiraho uburyo bw’imikoranire ku buryo dukorera abanyarwanda uko bikwiye. Ndabashimira kandi mbizeza ko aba bayobozi barahiye byose byose bizubahirizwa. Ko imirimo bashinzwe bazayubahiriza ari n’abo basanze bagafatanya kugirango imirimo irusheho koroha."

Perezida Kagame kandi yagarutse ku matora ya Perezida ateganyijwe muri Kanama, avuga ko mu bindi bihugu impeshyi ari umwanya w’ibiruhuko, nyamara ngo mu Rwanda kubera amatora uzaba umwanya w’akazi gusa avuga ko abantu bahsobora gufatanya ntibavunike..

Ati " Muri aya mezi turimo abandi baba bari kujya mu biruhuko kubera ko nibwo baba babonye akazuba ubundi bahora mu mwijima no mu mbeho n’ibindi. Kuri twebwe, ubundi ntabwo twari twanze ikiruhuko ariko ngirango muri uyu mwaka tuzaba tujya mu matora nabyo dushobora kubifatamo nk’ikiruhuko, abantu bagakora batavunitse cyane ariko tukuzuza iyo nshingano y’amatora."

Perezida Kagame ariko yanavuze ko waba umwanya mwiza wo kujya mu giturage guhura n’abaturage mu gihe cy’amatora, bikaba umwanya wo guhura n’abo batakundaga guhura ndetse no kugera aho batajyaga bagera.

Yisangize Inshuti.

Ibitekerezo 1

Tanga Igitekerezo