Kwamamaza

Politiki

Perezida Kagame uri muri Ghana yavuze iby’ingenzi byafasha kugera ku ntego z’iterambere rirambye

Yanditswe

kuya

na

Jean Paul Niyitanga
Perezida Kagame uri muri Ghana yavuze iby’ingenzi byafasha kugera ku ntego z’iterambere rirambye

Perezida wa Repubulika y’u Rwanda Paul Kagame uri i Acra muri Ghana aho yitabiriye inama yiga ku ishyirwa mu bikorwa ry’intego z’iterambere rirambye yavuze ko guha umwanya abikorera no kuzamurana hagati y’ibihugu biri muby’ingenzi byafasha kugera ku ntego z’iterambere rirambye.

Iyi nama yateranye kuva kuri uyu wa 11 Ukuboza igamije kwigira hamwe ibijyanye no gushishikariza abantu intego z’iterambere rirambye (SDGs) no gushyira imbaraga mu ishyirwa mu bikorwa ry’izo ntego.

Zimwe mu ntego z’iterambere rirambye isi yihaye harimo kurandura ubukene n’inzara, kugabanya ubusumbane mu baturage, kugeza ku baturage amazi n’amashanyarazi, kuzamura imibereho y’abaturage, kuzamura ireme ry’uburezi n’uburinganire, kugira inganda ziteye imbere, guteza imbere imijyi, kubungabunga ibidukikije, guteza imbere amahoro n’ubutabera n’ibindi.

Abayobozi b’ibihugu bahuriye mu Nteko Rusange y’Umuryango w’Abibumbye ya 193 yateranye muri Nzeri 2015 biyemeje ko Izi ntego bagomba kuzigeraho bitarenze muri 2030

Mu mbwirwaruhame Perezida w’u Rwanda Paul Kagame yagejeje ku batandukanye bitabiriye iyi nama mu ntangiriro zayo, yavuze ko hari ibintu bibiri by’ingenzi bishobora gufasha ibihugu mu kugera kuri izo ntego.

Yavuze ko icya mbere ari uguha umwanya abikorera, icya kabiri kikaba gufatanya no kuzamurana kw’ibihugu byose aho kuzamura ibihugu bimwe gusa.

Yagize ati: "Hari ibintu bibiri by’ingenzi byazana impinduka dushingiye ku bunararibonye bw’intego z’ikinyagihumbi, dushobora kubyifashisha mu gihe duharanira kugera ku ntego nshya n’impinduka ku buzima bw’abaturage bacu. Icya mbere ni ugushyira imbaraga mu rwego rw’abikorera nka moteri yo kurandura ubukene ikazana ubuzima bwiza ikanashyiraho intego ziri mu byo ibihugu byinshi biba bipanga gukora."

Perezida Kagame avuga ko za Guverinoma zidafatanyije n’abikorera zidashobora guhuza intego z’ibihugu n’intego z’iterambere rirambye ngo byose bibashe kugerwaho neza. We avuga ko abikorera ari inkingi ikomeye yatuma Leta igera ku ntego runaka kandi n’abikorera ntibasigare inyuma.

Yakomeje agira ati: "Abikorera nibo bashobora kuziba icyuho cyo kubura amafaranga yo gukora imishinga ikomeye binyuze mu kuba Leta n’abafatanyabikorwa bayo bashyizeho uburyo bwiza bworohereza abikorera."

Ikindi Perezida Kagame yagarutseho ni kuzamurana kw’ibihugu byose aho kuzamura ibihugu bimwe gusa. Yavuze ko hari ibibazo biba bireba ibihugu byose ku buryo hasabwa ubufatanye no kunganirana ntihagire igihugu gisigara inyuma.

Ati: "Ibi bizana uburyo bushya bw’ubufatanye mpuzamahanga no kwigiranaho, bizanatuma habaho uburyo bwo kugenzura intambwe ziterwa no gushyira mu bikorwa izi ntego mu buryo bujyanye n’ibihugu byacu."

Perezida Kagame yagarutse ku ruhare rw’ubuyobozi mu gushyira mu bikorwa izi ntego avuga ko ibihugu bigomba kubigira ibyabyo bidategereje abaterankunga gusa.

Ati: “Byose bitangirira mu kubigira ibyawe, tugomba guhangana n’ibibazo byacu, nibyo dufite abaterankunga n’inshuti bashaka kudufasha ariko ntitugomba kwemera ko badukorera byose.”

Avuga ko Afurika ifite ubushobozi bwo gukora ibyo benshi bibwira ko bitakoreka, anavuga ko hadakwiye kugira usigara inyuma muri urwo rugamba, ahubwo ngo abagore, urubyiruko n’abikorera ni ingenzi gukorana na bo.

Perezida Kagame yavuze ko Leta y’u Rwanda izakomeza gukorana neza n’ibindi bihugu cyane cyane binyuze mu kigo cy’intego z’iterambere rirambye muri Afurika ‘Sustainable Development Goals Center for Africa-SDGC/A gifite ikicaro mu Rwanda.

Yanasabye abitabiriye iyi nama gukomeza gutera inkunga iki kigo no kukibyaza umusaruro w’icyo cyashyiriweho.

IBITEKEREZO

Tanga igitekerezo


Kwamamaza Car Free Day/ 18/02/2018
INKURU ZAMAMAZA 10-08-2018

ITANGAZO RYA CYAMUNARA

Kwamamaza
Perezida KAGAME avuga ku manyanga mu Iyubakwa rya Hotel ya FERWAFA n’ikibazo cy’abana bo ku mihanda
KAGAME avuga kuri za Mission z’abayobozi zidasobanutse
IBYO ABANYAMAKURU BAVUGA KU IYEGURA RYA Fred MUVUNYI ku buyobozi bwa RMC
Uwari V/Perezida w’Urukiko rw’Urukiko rurinda Itegeko Nshinga/ Burundi
RUNIGA avuga uko bazinjira Congo
Ubutumwa bw’Umuturage kuri Perezida KAGAME
Kwamamaza