Perezida Kagame afite inzozi ku buhahirane n’ubukerarugendo muri Afurika

Mu kiganiro Perezida Kagame yagiranye na Perezida wa Benin Patrice Talon, yavuze ko ababazwa nuko abanyafurika basura ibindi bihugu byose byo ku Isi ariko ntibasure ibihugu bya Afurika, avuga ko afite inzozi zo gutangiza umubano ushingiye ku buhahirane n’ubukerarugendo muri Afurika

Ibi Perezida Kagame yabitangaje nyuma yo kwakira Perezida wa Benin Patrice Talon uri mu ruzinduko rw’akazi rw’iminsi itatu mu Rwanda kuva kuri uyu wa 29 Kanama 2016.

Nyuma yo kwakirwa mu Rwanda, Perezida Talon yatangaje ko yishimiye iterambere ry’u Rwanda ndetse n’imiyoborere yarwo yatumye ruva mu bihe bikomeye bya Jenoside yakorewe Abatutsi kuri ubu rukaba ruzwi ku buyobozi bwiza.

Perezida Talon yagize ati: "Nasuye u Rwanda mu izina ry’igihugu cyanjye kandi nk’umunyafurika kugirango nerekana ishema ntewe n’imiyoborere yarwo. Iki gihugu cyamenyekanye ku mateka mabi ariko ubu cyongeye kumenyekana ku buyobozi bwiza, nishimiye icyubahiro uha abanyafurika, iki gihugu cyanyigishije ko iyo ufite ubushake n’ubufatanye ushobora gukora byinshi kurusha abandi"

Perezida Talon yavuze ko ashaka ko ubufatanye bw’u Rwanda na Benin buba intangarugero ku bindi bihugu. Ati: "Ndashaka ko ubufatanye bw’u Rwanda na Benin buba intangarugero, dushobora kwerekana ko dufite ubuhahirane bw’ingirakamaro kandi igihugu kimwe kikigira ku kindi. Nyuma yo kwigira ku Rwanda nafashe umwanzuro wo kutazongera kwaka Visa Abanyafurika bose"

Perezida Kagame yavuze ko yishimiye uburyo igihugu cya Benin cyakoze amatora mu mucyo no mu bwisanzure ntabonekemo imvururu n’umutekano muke.

Ati: "Ndashimira guverinoma ya Benin n’abaturage bayo ndetse na we ubwawe kuba mwaragize amatora meza, politiki nziza ikorewe mu mucyo n’umutekano ni umuzi w’iterambere ry’ubukungu n’imibereho myiza, reka dukomeze gufatanya mu gukorera ibintu byiza abaturage bacu n’isi yose"

Yakomeje agira ati: "Mu minsi mike RwandAir izatangira kujya i Cotonou, nta mpamvu n’imwe twatanga yo kudasurana birenze, dufatanye duhamye umubano hagati y’u Rwanda na Benin n’umuco wa Afurika w’ubumwe n’iterambere ari na byo uru ruzinduko rugaragaza, Abanyafurika basura ibindi bihugu ku Isi ariko ntibasure ibihugu by’Afurika, inzozi zanjye ni ugutangiza umubano w’ubuhahirane n’ubukerarugendo"

Perezida Patrice Talon yatangiye kuyobora Benin muri Mata uyu mwaka, uru rukaba ari uruzinduko rwe rwa mbere agiriye mu Rwanda rwitezweho guhindura byinshi mu buhahirane bw’ibihugu byombi.


Imbyino za kinyarwanda ni zo zakirijwe Perezida Talon



Perezida Talon yakiriwe na Perezida Kagame n’abandi banyacyubahiro batandukanye


Perezida Talon yashimiye Perezida Kagame ku iterambere agejeje ku Rwanda


Perezida Kagame yavuze ko afite inzozi zo gutangiza ubukerarugendo n’ubuhahirane muri Afurika


Ibi biganiro byitabiriwe n’abandi bayobozi mu nzego zitandukanye


Perezida Kagame na Perezida Talon bemerenyijwe umubano w’itangarugero

Yisangize Inshuti.

Ibitekerezo

Tanga Igitekerezo