Ntitwasuka lisansi n’umuriro ku bimeze nabi ngo twizere ko bizazima-Kagame

1

Perezida Kagame aganiriza abanyeshuri bo muri Kaminuza ya Yale

Perezida Paul Kagame yavuze ko ibibazo biri muri iyi si ahanini bikururwa n’ibihugu byitwa ko bikomeye, bishaka gushyiraho amahame ibindi bihugu bigenderaho rimwe na rimwe bitajyanye n’amateka yabo bashaka ko bakurikiza ayo mahame.

Ibi yabitangaje kuri uyu wa Kabiri mu kiganiro yatangiye muri Kaminuza ya Yale iherereye mu Mujyi wa New Haven muri Leta ya Connecticut mu gikorwa ngarukamwaka Coca-Cola World Fund Lecture.

Mu kiganiro yagiranye n’abanyeshuri bo muri iyo kaminuza, Perezida Kagame yashimye umuhate uri kugaragazwa n’Umuryango w’Abibumbye (ONU) mu guharanira iterambere rirambye ndetse no guhangana n’ihindagurika ry’ibihe.

Icyakora nubwo ONU iri kwitwara neza muri iyo minsi, Perezida Kagame yavuze ko yagiye igira inenge kandi n’ubu ikigaragaza, aho hari ibihugu bisa n’ibishaka gushyiraho imirongo ibindi bigenderaho, bigatuma aho kugira ngo ibintu bigende neza ahubwo birushaho kuzamba.

Yagize ati: “Hari impungenge ku bushobozi bw’Umuryango mpuzamahanga wo guhangana n’ibibazo bikomeye, akenshi ibyo uwo muryango ukora ntibigera ku ntego, ahubwo bituma ibintu birushaho kuba bibi.”

Imbere y’abanyeshuri bagera kuri 400, Perezida Kagame yakomeje avuga ko u Rwanda rwo rubizi cyane bitewe n’amateka rwanyuzemo ari na yo mpamvu ruza ku mwanya wa Gatanu mu bihugu bigira uruhare rukomeye mu kagarura amahoro aho yabuze.


Abanyeshuri biga muri Yale

Kubw’ayo mateka, ngo bimwe mu bihugu bishyiraho umurongo bigenderaho bigamije kwiteza imbere, bigakomwa mu nkokora n’ibindi byitwa ko bikomeye bishaka ko ibintu bikorwa uko bishaka.

Ati: “Bakomeza gushyiraho imirongo ngenderwaho ndetse n’ibigomba kuyivamo nta no kuganira n’abo bayishyiriyeho…hari ibihugu bishaka kuba ibyizerwa, bigashaka guhagararira inyokomuntu yose. Ibi bitesha agaciro ubufatanye n’indangagaciro umuryango mpuzamahanga wubakiweho.”

Yavuze ko kugira ngo ibintu bigende neza umutekano uboneke, ibihugu bikwiye kureka abaturage b’ibindi bihugu bagakora ibyo bihitiyemo bazakorana uko bashaka, kabone nubwo uburyo bikorwamo bwaba butandukanye n’ubw’ahandi bakoresha.

Ati: “Nta kintu na kimwe cyakorwa binyuranyije n’ibyifuzo by’abaturage ngo kirambe. Amahame ashaje y’uko hari ababereyeho gutegeka abandi ibyo bakora, niyo ntandaro y’ibibazo mu mibanire mpuzamahanga.”

“Ni byiza gutuma impinduka zoroha zubakiwe ku bwumvikane hirindwa ingaruka mbi aho kugira uruhare mu bwicanyi, ugatwika domokarasi. Ntitwasuka lisansi ku bintu bimeze nabi, ngo ducane ikibiriti ngo twizere ko umuriro uzaza ukabihanagura ukabigira bishya.”

Perezida Kagame avuze ibi mugihe hirya no hino ku isi havugwa intambara mu bihugu nka Siriya, Iraq, Sudani y’Epfo n’ahandi, kandi bikavugwa ko ahanini biterwa n’inyungu z’ibihugu bikomeye.

Yisangize Inshuti.

Ibitekerezo 1

Tanga Igitekerezo