Ntabwo ikoranabuhanga ari ryo rizakuraho ubusumbane mu bagabo n’abagore -Perezida Kagame

1

Perezida Paul Kagame yavuze ko ikoranabuhanga atari ryo rizakuraho ubusambane hagati y’abagabo n’abagore baryitabira, ngo ahubwo ubushake bwa politiki nibwo buzatuma ibyo byose bishoboka.

Yabitangaje kuri uyu wa Kane mu nama ya Transform Africa, mu kiganiro cyavugaga ku kwihutisha ikoranabuhanga ku mugabane wa Afurika, inzitizi zihari n’amahirwe yakubakirwaho ngo bigerweho vuba.

Perezida Kagame mu kiganiro yari kumwe na Perezida wa Mali, Mohamed Aboubakar Keita, Visi Perezida wa Zambia, Inonge Wina; Minisitiri w’Intebe wa São Tomé, Patrice Emery Trovoada; Perezida wa Djibouti, Ismaïl Omar Guelleh; Perezida wa Niger, Mahamadou Issoufou; Minisitiri w’Intebe wa Gabon, Emmanuel Issoze-Ngondet na Minisitiri w’Intebe wa Guinée équatoriale, Francisco Pascual Eyegue Obama Asue.

Yavuze ko ahanini ibibazo bikibase iterambere ry’ikoranabuhanga ku mugabane wa Afurika ari imyumvire y’abayobozi b’ibihugu bigize uwo mugabane kurusha kuba ibikorwa remezo ari bike avuga ko mbere na mbere hakwiye kumvwa ko ibintu byihutirwa, ntibivugwe gusa ngo bihere mu magambo.

Yagize ati “ikoranabuhanga rifasha impinduka kwihuta, kandi rigatuma ibintu bihenduka..Nk’ubu kuba ibihugu byinshi bya Afurika bitaragera ku bufatanye bukwiye, ntabwo byatewe n’ibikorwa remezo cyangwa se ubumenyi buke ahubwo byatewe no kumva ko bitihutirwa.Hari n’abumva nibashora imari zabo zizahomba kandi abandi bunguka ariko tugomba kurenga iyo myumvire.”

Perezida Kagame ntahakana ko ibikorwa remezo byorohereza ikwirakwiza ry’ikoranabuhanga atari bike muri Afurika, ariko asanga habayeho ubushake bwa politiki ndeste no kumva ko byihutirwa nta kabuza byagerwaho.

Ati “Yego turacyafite ibibazo mu bikorwa remezo, dukwiye gukomeza gushoramo imari ariko nanone dukwiye no gushora imari mu banyapolitiki bacu bakumva ibikenewe kurusha ibindi.”

Yatanze urugero rw’aho nk’ubu byakabaye byoroshye kuva mu Rwanda ufite internet, wagera no muri Gabon ntibigusabe kugura indi, ariko ngo ntibirakunda atari uko bigoye ahubwo kuko bitashyizwe mu bigomba kwihutirwa.

Perezida Kagame yagarutse ku kibazo cy’uburinganire buri hasi mu bijyanye n’ikoranabuhanga, aho usanga abagabo bari mu bikorwa by’ikoranabuhanga baruta cyane abagore.

Yavuze ko icyo kibazo kitazakemurwa n’ikoranabuhanga ubwaryo, ahubwo ko bwa bushake bw’abanyapolitiki aribwo buzahindura ibintu.

Ati “Ntabwo technology ariyo izakemura ikibazo cya gender, ni politiki izagikemura.Politiki niyo izagira uruhare mu gukangurira abagore n’abagabo kugana ikoranabuhanga.Nuha abagore n’abakobwa uburenganzira bungana, ibindi bizizana.Niba uri kwigisha abakobwa n’abahungu kimwe, ukabaha amahirwe angana mu kugaragaza impano bafite, mu ikoranabuhanga nta kibazo kizazamo.”

Minisitiri w’Intebe wa Guinea Equatorila, Obama Asue yavuze ko ibihugu bya Afurika bikwiye kwigira ku bindi, ikoranabuhanga rifite akamaro ahandi, rikifashishwa no mu bindi bihugu.

Ati “Dukwiye gufata ibiri kugira akamaro mu bindi bihugu bya Afurika natwe tukabigira.Ukurikije ubukire dufite, ubunararibonye n’amahirwe yose dufite, ndizera ko tuzabigeraho.”

Umuyobozi wa Sosiyete Econet, Strive Masiyiwa yavuze ko ibihugu bya Afurika mbere na mbere bikwiye kubanza kugira ubufatanye mu buhahirane.

Yavuze ko bibabaje kuba Afurika ariyo ifite ikigereranyo gito cy’uburyo ibihugu byayo bihahirana mu bucuruzi aho biri munsi ya 15 %,mu gihe ku yindi migabane ibihugu byegeranye aribyo bihahirana cyane.

Yisangize Inshuti.

Ibitekerezo 1

  1. Muturebere umutwe wíyi nyandiko ntabwo usobanutse neza. Muwukosore niba ari ngombwa. Roger

Tanga Igitekerezo