Nta gihugu kitagerwaho n’ingaruka z’ihindagurika ry’ibihe nubwo cyaba igihangange –Ki-Moon

Umunyamabanga mukuru w’umuryango w’abibumbye Ban Ki-Moon yahamagariye abakuru b’ibihugu bitabiriye inama ku mihindagurikire y’ikirere guhagurukira iki kibazo kuko ngo nta gihugu na kimwe ku isi kitazagerwaho n’ingaruka zacyo nubwo cyaba igihangange.

Ibi ni bimwe mu byo Ban Ki-Moon yavugiye mu nama ya 22 y’umuryango w’abibumbye yiga ku mihindagurikire y’ibihe yiswe COP22 iteraniye i Marrakech muri Maroc.

Iyi nama yanitabiriwe n’umukuru w’igihugu cy’u Rwanda Nyakubahwa Paul Kagame na Madawe we Jeannette Kagame, yatangiye kuwa 07 Ugushyingo 2016 ikazasoza kuwa gatanu tariki 18 Ugushyingo 2016.

Ban Ki-Moon yavuze ko ikibazo cy’ihindagurika ry’ikirere gihangayikishije Isi ndetse avuga ko yanabigaragaje kuva agiye ku buyobozi bw’umuryango w’abibumbye.

Ati: “Ihindagurika ry’ikirere ni ikintu nahaye umwanya wa mbere nkigera ku mwanya w’umunyamabanga mukuru w’umuryango w’abibumbye, mu myaka 10 twageze kuri byinshi, ubu ibihugu byose bimaze kubona uburemere bwabyo”

Yakomeje avuga ko kuba ibihugu byose bimaze gushishikarira guhangana n’iki kibazo, ari igihe kiza cyo gufatanyiriza hamwe guhangana na cyo ku buryo butigeze kubaho.

Ati; “Igihe kirageze ngo dufatanye kurinda umugabane wacu twivuye inyuma kurusha uko bisanzwe, ingaruka z’imihindagurikire y’ikirere zigiye kwiyongera, igihe kiradusatiriye, nta gihugu na kimwe nubwo cyaba igihangange gishobora kwihisha ingaruka z’imihindagurikire y’ibihe.”

Kuri Ban Ki-Moon ngo Isi nta yandi mahitamo ifite bitewe nuko abatuye isi badafite amahitamo yo kujya ku wundi mubumbe uretse iyi si, bityo ngo amahitamo ni ayo guhangana n’imihindagurikire y’ikirere.

Yagize ati: “Nta yandi mahitamo dufite kuko nta wundi mubumbe twabona, ndababwira ibingibi nk’abaturage batuye iyi si. Abaturage, imijyi n’amasosiyete bafite uruhare rukomeye mu gushyira mu bikorwa amasezerano y’ i Pari”

Uretse ibibazo by’imihindagurikire y’ikirere, iyi nama iziga ku bindi bibazo bikomereye isi birimo inzara, ubuhinzi, inganda, ingufu, amazi, gutwara abantu n’ibintu n’ibindi bifite aho bihuriye n’imihindagurikire y’ibihe.

Iyi nama yitabiriwe n’abakuru b’ibihugu basaga 30 bakaba baziga cyane ku buryo haboneka uburyo bwo kugabanya igipimo cy’ubushyuhe bw’isi bukajya munsi ya dogere serisiyusi ebyiri nkuko byemerejwe mu masezerano ya Pari yashyiriweho umukono i Pari mu Bufaransa kuwa 12 Ukuboza 2015.


Abakuru b’ibihugu batandukanye barimo na Perezida Kagame biyemeje guhangana n’ihindagurika ry’ibihe

Perezida Kagame yakiriwe n’umwami wa Maoc


Ban Ki-Moon n’umwami wa Maroc bakiriye Perezida Kagame


Iyi nama yitabiriwe n’abanyacyubahiro baturutse mu mpande zose z’isi

Yisangize Inshuti.

Ibitekerezo

Tanga Igitekerezo