Mushikiwabo yahagarariye Perezida Kagame mu muhango wo gusezera kuri Shimon Peres

4

Minisitiri Mushikiwabo yigeze kuganira imbona nkubone na Shimon Peres muri Nyakanga 2014

Minisitiri w’ububanyi n’amahanga w’u Rwanda akaba n’umuvugizi wa Guverinoma Louise Mushikiwabo ni we wahagarariye Perezida wa Repubulika y’u Rwanda Paul Kagame mu muhango wa gusezera kuri Nyakwigendera Shimon Peres wabaye Perezida wa Israel uherutse kwitaba Imana.

Abantu ibihumbi n’ibihumbi barimo n’abakuru b’ibihugu na za Guverinoma bari mu gihugu cya Israel mu mujyi wa Yelusalemu aho bahuriye mu muhango wo gusezera kuri Shimon Peres wayoboye iki gihugu witabye Imana ku wa 28 Nzeli 2016 azize ikibazo cyo gutembera kw’amaraso mu bwonko nyuma y’iturika ry’iminsi yo mu mutwe.

Minisitiri w’ububanyi n’amahanga akaba n’umuvugizi wa Guverinoma y’u Rwanda Louise Mushikiwabo ni we wahagarariye Perezida Kagame w’u Rwanda muri uyu muhango wo gusezera kuri Nyakwigendera.

Nkuko yabitangaje yifashishije urukuta rwe rwa Twitter, Minisitiri Mushikiwabo yavuze ko kwitabira uyu muhango ari ikimenyetso cyo kwerekana ko u Rwanda rwifatanyije mu kababaro n’abaturage b’igihugu cya Israel kubera urupfu rwa Shimon Peres.

Mu butumwa bwe Minisitiri Mushikiwabo yagize ati: "Ndi i Yelusalemu nk’intumwa ya Perezida Kagame mu muhango wo gusezera kuri Shimon Peres nk’ikimenyetso cy’uko u Rwanda rwifatanyije mu kababaro n’abaturage ba Israel"

Uretse intumwa ya Perezida Kagame, umuhango wo gusezera kuri Nyakwige Peres witabiriwe n’ibindi bikomerezwa muri politiki nka Peresida wa Leta zunze ubumwe za Amerika Barack Obama, Perezida wa Palestine Mahmoud Abbas, Umunyamabanga Mukuru w’Umuryango w’Abibumbye Ban Ki-moon, Peresida w’ubufaransa Francois Hollande, Bill Clinton wahoze ayobora Amerika, umunyamabanga wa Leta zunze ubumwe za Amerika John Kerry, uwahoze ari Minisitiri w’intebe w’Ubwongereza Tony Blair, Perezida w’Umuryango w’ubumwe bw’u Burayi Donald Tusk n’abandi.

Umuhango wo gushyingura Peres ni cyo gikorwa kitabiriwe kuri uru rwego muri Israel kuva hashyingurwa Minisitiri w’Intebe w’iki gihugu Yitzhak Rabin, wishwe mu 1995.

Uyu mukambwe witabye imana afite imyaka 93 yanditse amateka meza mu guharanira amahoro hagati y’igihugu cye cya Israel n’igihugu cya Palestine, binatuma ahabwa igihembo cy’amahoro cyitiriwe Nobel ( Nobel Peace Prize) 1994 we na Yasser Arafat wayoboraga Palestine kubera uruhare rwabo mu guharanira amahoro hagati y’ibihugu byombi.

Peres yavutse tariki 2 Kanama 1923 akaba yarapfuye kuri uyu wa 28 Nzeli 2016, Yatorewe kujya mu Nteko Ishinga Amategeko ya Israel mu 1959 ndetse aza kuba Minisitiri w’ingabo mu 1976, yatorewe kuba Minisitiri w’intebe inshuro ebyiri kandi yabaye Perezida wa cyenda wa Israel, kuva muri 2007 kugeza muri 2014.


Kuri ubu umurambo wa Peres uri kuruhukira imbere y’Inteko Ishinga Amategeko i Yeruzalemu.


Minisitiri w’intebe wa Israel Benjamin Netanyahu aha icyubahiro nyakwigendera Pseres


Bill Clinton wayoboye Leta zunze ubumwe za Amerika mu muhango wo gusezera Shimon Peres


Umurongo w’abantu benshi bitabiriye uyu umuhango


Perezida wa Israel Reuven Rivlin asezera bwa nyuma kuri Peres


Ifoto y’amateka igaragaza Peres asuhuzanya n’uwari Perezida wa Palestine Yasser Arafat muri 2001.

Yisangize Inshuti.

Ibitekerezo 4

  1. najye kubazwa ibyo yakoze isi nintizanyo siyacu aho niho imana ikomerera kko ntibagusyira mukirere agiye guturana nabo yishe imana niyo nkuru

Tanga Igitekerezo